Søkjer om tilskot til to kyrkjer
– Vi er glade for å sjå at det alt i første søknadsrunde er så god søking på midlane i kyrkjebevaringsfondet. Det understrekar at det er eit stort behov for bevaring av kyrkjene våre, seier statsråd Kjersti Toppe (Sp).
I ei pressemelding frå Riksantikvaren får me ei oversikt over alle som har søkt om midlar. Kyrkjeeigarar kunne søka om tilskot til både forprosjekt, altså planlegging, og hovudprosjekt, sjølve bygginga. Totalt har det blitt søkt om heile 581 millionar, og 144 millionar av dette gjeld midlar som søkarane ynskjer å bruka alt i 2024.
På oversikta over kyrkjene som har søkt, finn me Ænes kyrkje og Kvinnherad kyrkje.
Annonse
Auka ramme i vente
Preses i Den norske kyrkja, Olav Fykse Tveit, er leiar for programstyret for Kyrkjebevaringsfondet, som skal tildela tilskot:
– Tildelinga skal skje raskt for å få pengane i arbeid, og me siktar mot september, kommenterer Tveit.
Ramma ligg på 100 millionar, altså mindre enn ein femtedel av den totale søknadssummen. Men alt i haust kjem neste søknadsrunde, så det kjem nye moglegheiter for å få ein del av potten for 2025. Regjeringa har tidlegare varsla ei gradvis opptrapping opp mot 500 millionar i året til Kyrkjebevaringsfondet.
Annonse
Så gjenstår det å sjå om Ænes og Kvinnherad kyrkje får tilskot i denne omgangen, eller må prøva igjen seinare.
