Søkjer etter dagleg leiar

Fjellhaugen Skisenter søkjer etter ein person som brenn for at Kvinnherad skal ha eit skisenter no og i framtida.

Sidan årsskiftet har dagleg leiar-funksjonen i Fjellhaugen Skisenter vore skjøtta av styreleiaren. No er skisenteret på leit etter ein fast dagleg leiar.

– Me kjem til å søkja etter dagleg leiar, og har utarbeidd annonsen, som snart er klar for offentleggjering, stadfestar styreleiar i Fjellhaugen Skisenter Sissel Haugen til Grenda.

Ho har fungert som dagleg leiar i selskapet sidan nyttår, i tillegg til å vera styreleiar.

– Eg held fram som styreleiar, men det er ikkje tenleg å kombinera dei to posisjonane over tid, då det bør vera fordelt på to ulike personar. Det har gått fint og vore kjekt, og eg skulle ønska eg kunne hatt jobben sjølv, men kan ikkje kutta lærarstillinga mi for den jobben, seier ho.

Dugnadsdrift

Kvinnherad kommune (56,7%) er største eigar i aksjeselskapet, medan idrettslaga Omvikdalen IL (11,2%), Rosendal TL (6,25%), Matre IL (3,7%) og Uskedalen IL (2,9%) er av idrettslaga som eig i selskapet, men det er langt på veg framleis drive på dugnad.

Stillinga som dagleg leiar er i utgangspunktet tenkt som ein 20 prosent-stilling, men det kan endrast om det viser seg at behovet tilseier det.

I følgje Haugen søkjer ein etter ein person som brenn for at Kvinnherad skal ha eit skisenter no og i framtida.

– Det er ein triveleg, kjekk jobb, og eg kan anbefala han til kven som helst, men ein bør jo ha eit forhold til snø, fjell og ski, seier Haugen.

Ho påpeikar at jobben er fleksibel i høve arbeidstida, då den kan kombinerast med til dømes Nordsjø-turnus og er basert mest på heimekontor.

I tillegg til det økonomiske ansvaret, blir oppfølginga av dei frivillige ei viktig rolle for den nye daglege leiaren.

– Me har også ein driftsleiar som har ansvaret for skitrekk og maskinpark, og den daglege leiaren kjem til å samarbeida med han, seier Haugen for å forklara skilnaden i oppgåvene i skitrekket.

– Håper på betre sesong

Førre sesong var ein vanskeleg sesong, med mykje variert vêr.

– Me håper på ein langt betre sesong i år, sjølv om det er spennande med at påsken er veldig sein i 2025. Me får tru me får nokre gode snødagar før den tid, og kryssa fingrane for at han held til påske. Skisenteret har på plass to ny snøvifter som me håper å få brukt mykje. Dei kan flyttast på og syta for snø fleire plassar, inkludert i dei lågaste delane av lysløypa, fortel styreleiaren.

Dugnadsinnsatsen i trekket er det lite å utsetja på.

– Me har vaktlister som går frå romjul til påske, og har rundt 60 frivillige som var klare til å ta sine vakter i skitrekket. Har god vaktplan og god base med frivillige til å ta seg av dette, sluttar Sissel Haugen.