Snop og sider - topp stemning på den store kinodagen

Laurdag kunne ein få kinobillettar til halv pris, og det var også lagt opp til andre tilbod og aktivitetar. Grenda stakk innom i forkant av barnefilmen på dagtid, og der var mange blide fjes.

– Me har brukt litt tid på å rigga til her, seier Storm Nyrud Uppheim bak skranken på kinoen.

Kinovertane har sett fram langbord og teiknesaker, så alle ungane får teikna. Sidan barnefilmen denne dagen er «Den ville roboten», får alle levera kvar si robot-teikning om dei vil vera med i trekninga av tre premiar. Kvar premie består av to gratisbillettar og popcorn til ein valfri film.

Smågodt og sider

– Det var ein fin robot! Mamma, korleis får ho til å teikna så fint?, vert det kommentert over bordet.

– Oi, det er snop her, er det nokon som utbryt.

Kinovertane har nemleg også kjøpt inn ti kilo smågodt, som folk kan forsyna seg av.

– Kanskje vaksen-publikummet seinare i dag òg får litt, dersom det er noko igjen då, seier Uppheim håpefullt.

Men seinare på dagen stilte vertane også med andre freistande tilbod. Til Armand-filmen klokka 16 spretta dei ti flasker alkoholfri musserande. Det same gjorde dei til kveldsfilmen. Då delte dei i tillegg ut «goodiebags» til dei tretti første frammøtte.

– Kva er det i goodiebagen då?

– Nei, det er hemmeleg, smiler vertane.