Snø, lukt av jul og litt skjegg i postkassen
Laurdag var det Jul på Ranchen på Valen. Arrangementet baud på ei rekkje aktivitetar som tydeleg fall i smak hjå både store og små.
Publisert
Her var det nemleg mogleg å handle lokalproduserte varer, rykande ferske vaflar, eller kjekke julegåver frå marknadsteltet, noko mange nytta seg av.
Ina Katrine Johansen Handeland var ei av utstillarane i teltet. Ho har tidlegare delteke på fleire marknadar som kunde, men dette var første gong ho sjølv sto bak disken. Med seg hadde ho heimelaga drops og karamellar, samt flaskenissar og godtenissar.
Annonse
Det var dessutan smaksprøvar å hente, noko Lea Marie (9) med glede tok i mot.
– NAM! utbraut ho blidt, då ho fekk ein drops med colasmak på tunga.
Haldt varmen med hesteriding
Valen ride og kjøreklubb tok i mot born som ville ri seg ein runde, kor Helene Handeland (13), Victoria Andreassen (14) og Inger Helen Skarveland (13) traska i ring i 2,5 timar, med dei tolmodige hestane Sess og Lure Donna. Heile følgjet var julepynta for høvet.
Annonse
– Det har vore litt kaldt, men eg har halde varmen greitt. Det har blitt nokre steg desse timane, smilte Helene med roser i kjakane.
Alexander Rasmusen Lundal (10) og Tobias Berntsen Handeland (12) hadde kjøpt laurdagsgodteriet sitt i teltet, og hadde elles berre fine ting å sei om arrangementet.
– Det er fint og bra! konkluderte Alexander.
– Og gøy, supplerte Tobias nøgd, før dei traska attende til venegjengen, og gjorde seg klare for Nisseshow.
Forventningsfull hop
Og ein kunne kanskje tru at hendinga avslutta med eit brak, men her small det om lag midt i. Smellet kom som rakett frå hovudhuset, og merksemda på tunet vende seg såleis i så lende. På dette tidspunktet var den store forsamlinga klare for nisseshow, og stod fulle av forventning og nysteikte vaflar på ridebanen.
Annonse
Etter litt ventetid, som Brynjar (6) visste å utnytte til å lage ein snøball, rulla endeleg Skrotnissen, Fjompenissen og Tullebokken inn på arenaen, og bidrog til lått og løye blant dei som hadde møtt opp.
Showet let seg vanskeleg oppsummere, men det innehaldt alle ingrediensar eit juleshow treng: rampenissestrekar, blodmelter, eit imponerande engasjert publikum på fremste rad, mandarinpromp, allsong og sladding på sommardekk.
Jul på ranchen, med andre ord.
