Snart klart for Rosendalsveko
7. - 9. august er det duka for den tredje Rosendalsveko i Folgefonnsenteret, og store ord er igjen tema for klimakonferansen.
Publisert
Sist oppdatert
Rosendalsveko går av stabelen 7. - 9. august, og har undertittelen «Klima, energi, næring og berekraft på Vestlandet». Konferansen er eit samarbeidsprosjekt mellom Folgefonnsenteret, Havforskingsinstituttet og Bjerknessenteret/UiB for klimaforsking.
– Med Rosendalsveko ynskjer vi å samla kunnskapsinstitusjonar, næringsliv, samfunnsliv og politikarar på Vestlandet til idémyldring kring klima, energi og berekraftig ressursforvaltning, skriv arrangørane.
Annonse
Gjennom desse dagane vil utfordringane og moglegheitene ein står ovanfor bli diskutert. Programmet startar med ei evaluering om kor langt ein er komen i berekraftig omstilling på Vestlandet. Vidare er sentrale tema for konferansen kraft, klima, ressursforvaltning i havbruket, bioøkonomi, reiseliv og utdanning.
Store og viktige spørsmål
Gjennom desse dagane er det ei lang liste over bidragsytarar frå det lokale næringslivet, politikarar og frå ulike institusjonar som skal vera med i dei viktige diskusjonane ved Folgefonnsenteret. Blant føredragshaldarane er ordførar Hilde Enstad, styreleiar for Stiftinga Folgefonnsenteret Hans Inge Myrvold, direktør for Havforskingsinstituttet Nils Gunnar Kvamstø, rektor for UiB Margaret Hagen, seksjonssjef for Vestland fylkeskommune Kathrin Jakobsen, John Martin Mjånes (SKL) og Eigil Knutsen (AP) for å nemna nokre.
– Kor langt har me kome i berekraftig omstilling i Vestlandet? Korleis skaffa meir elektrisk kraft, og korleis nytta den på best måte? Korleis unngå å byggja ned meir natur - arealnøytrale løysingar og naturrestaurering?
Annonse
Dette er nokre av spørsmåla arrangørane og deltakarane stiller seg, og som kjem til å bli diskutert i løpet av Rosendalsveko.
Programmet for konferansen finn du på Folgefonnsenteret sine heimesider.
