Snart klart for årets siste innsamling til Ukraina

Siste THK-sending dette året frå Kvinnherad til Ukraina vert sendt 23. oktober.

THK-stiftelsen står knallhardt på for å hjelpa dei fattige og krigsråka innbyggjarane i Ukraina.

– På Ukraina-lageret i Uskedalen har vi mykje varer som er klare for sending. Langs med kjem gjevarar med sekker og utstyr som dei donerer til Ukraina. Når traileren kjem 23. oktober vert dette siste sending i år. Det er vanskeleg å seia når ei eventuell ny hjelpesending kan bli, opplyser stiftinga sin kontaktperson i Kvinnherad, Tormod Myklebust i ei pressemelding.

Som alle veit er Ukraina framleis i ein tragisk situasjon.

– Krigen gjer at dei må kjempa for fridom og fred. Innsatsen er formidabel. Ufatteleg mange familiar har det vanskeleg, blant anna fordi at far er i krigen. Mange er interne flyktningar, andre har flykta frå heimlandet. I tillegg vert store deler av landet bomba og øydelagt. Jordbruksland er minelagt, med meir. Energisituasjonen er vanskeleg. No kjem for mange ein hard vinter, fortel Myklebust.

Mange nye gravstader

Han slår fast at det er svært viktig å framleis hjelpa og støtta Ukraina.

– Vi opplever at krigen trøttar ut gjevarlanda som til no har hjelpt Ukraina. Samtidig veit vi at om vi sviktar Ukraina i desse tider, er framtida mørk. Ja, krigen gjer mange ting dyrare hos oss, men i Ukraina er det no mange nye gravstader, der ungdomar i tusental ligg. Nyttig å tenkja på at dei kjempar ein forsvarskrig. Tapar dei, så er det eit tap for oss òg, analyserer Tormod Myklebust.

Lageret i Uskedalen tek som alltid i mot klede, sko, sengklede, tepper, madrassar, soveposar, leiker med meir. Det går an å ringa for avtale om levering, men lageret vil også vera ope to laurdagar i oktober, høvesvis den 7. og den 14.