Snart klar med ein ny og betre butikk
Spar Uskedalen er i desse dagar i full sving med å oppgradera butikken for å bli meir energisparande, berekraftig og framtidsretta.
– Me byter ut alle kjølediskane, får ny ventilasjon, nye lys og heilt nytt kjøken. Dei nye kjølediskane skal gå på CO2, og no skal også kjølediskane i fruktavdelinga få dører, fortel dagleg leiar, Gunn Mari Moberg, over telefon.
– I tillegg skal alle lys bytast ut med LED-lys. Alt dette er med på å redusera straumforbruket, forklarer ho.
Annonse
Det blir også installert eit nytt og moderne kjøken, som er både enklare å bruka og lettare å halda reint og ryddig, i fylgje Moberg.
– I går fekk me ut dei gamle kjølediskane, noko eg var veldig spent på. Heldigvis gjekk alt fint, så no føler eg at den verste delen er overstått, fortel ein letta dagleg leiar.
Arbeidet held fram ut denne veka og inn i neste, og skal etter planen vera ferdig i løpet av komande tysdag.
– Me held stengt i nokre dagar no medan mesteparten av arbeidet føregår, men opnar butikken att på fredag, sjølv om ikkje alt er ferdig. Fyrst torsdag i neste veke skal me ha ei lita markering for å feira den nye butikken, fortel Moberg.
Annonse
Fyrst ute
Vidare fortel ho at alle SPAR-butikkane er i ein prosess med å få ny profil, og at Uskedalen er fyrst ute med den nye profilen i Sunnhordland.
– Det blir litt flytting av hyllene og ny vareplassering. Butikken blir jo ikkje noko større, men den nye profilen skal gje ei litt større romkjensle og litt betre oversikt i butikken, forklarar ho.
Me får også opplyst at dei har investert rundt 5 millionar kroner på oppgraderingane.
– Det er ein betydeleg sum, og eigentleg meir enn me fyrst hadde rekna med. Det er derimot viktig å utvikla seg, og følgja med i tida, seier ho.
– Me hadde nokre gode korona-år, så då er det kjekt å kunna investera i noko som gjev oss og lokalsamfunnet ein betre og meir berekraftig butikk, avsluttar Moberg.
