Snart kjem Bygdetroll

Tilbake i 2019 gav Husby ut si aller fyrste bok, ei diktsamling ved namna Vengjeslag, skriven under pseudonymet Anton Gravenstein. Dette karakteriserer han som ei forbok til denne nye boka.

Gøy prosess

– Planen var eigentleg at denne boka og førre bok skulle koma noko tettare saman, men så skjer det ulike ting i livet då. Ideen til boka kom i grunn til meg for fleire år sidan, men eg har berre skrive på den litt innimellom. Så i koronatidene sat eg meg ned for å skriva den ferdig, forklarer Husby.

– Men grunna litt andre jobbar og diverse så endar eg opp med å berre skriva på ho litt no og då. Til slutt ville eg rett og slett berre bli ferdig med ho, bli ferdig med denne ideen og få boka ut. Det er fyrste gong eg har skrive ein heil roman, men det har vore ein gøy prosess, fortset han.

Husby, som for tida bur i Molde, fortel at boka handlar om ein ung idealist som har lyst til å redda verda.

– Boka er i grunn todelt, det er notid der han er vaksen, men så ser han også tilbake på livet sitt. Han ser tilbake på oppveksten og studietida si, der det skjedde mykje i livet som var vanskeleg, samtidig leitar han litt etter bygdetrollet, fortel Husby.

– Og kva er bygdetrollet?

– Ja, kva er det? Det er nok litt vanskeleg å definera, men det er gjerne desse tinga som gjer litt vondt og som gjer at folk gjer dumme ting, svarar han etter noko områdingstid.

Men sjølv om diktsamlinga og denne boka heng saman er Husby klar på at det på ingen måte er naudsynt å måtte ha lest Vengjeslag for ha glede av Bygdetrollet.

– Pesydonymet Anton Gravenstein er også ein av karakterane som hovudpersonen møter på i Bygdetrollet då han reiser rundt og intervjuar folk. Det kan sjåast på som eit fint vedlegg for dei som er spesielt interesserte, men absolutt ikkje nødvendig for å lesa den nye boka, poengterer han.

Rein fiksjon

Husby understrekar også at bygdene som vert presenterte i boka er oppdikta sjølv om hovudkarakteren held til i Bergen.

– Eg har nok henta inspirasjon frå fleire bygder, historier eg har høyrt eller folk eg har møtt. Ein hentar jo inspirasjon frå ting, men bygdene er elles rein fiksjon. Det er altså ikkje Rosendal det er snakk om, ler forfattaren.

Kva tid boka kjem i hyllene derimot er noko usikkert.

– Forhåpentlegvis i løpet av november. Eg trur det skal gå heilt fint, seier han.

– No når denne boka er ferdig, har du andre idear eller prosjekt på gang?

– Eg har fleire bokprosjekt på idéstadiet, men det er uvisst kva tid dei vert skrivne. Eg satsar på å gje ut fleire bøker etter kvart, avsluttar han.