Snart kan ein førehandsrøyste – Bli med då vel

På fredag kalla dei valansvarlege, Lars Næs og Bente Høyland, inn til pressekonferanse for å gå gjennom korleis valet i år kjem til å bli gjennomført, og kommunen ynskjer å nå ut til flest mogeleg.

– Ved førre kommunestyreval var 41,1 % av dei totale røystene førehandsrøyster, ved førre stortingsval var talet 65 %. Sjølv om me var midt oppi korona ved dei vala, så ser me at trenden er at fleire og fleire vel å gjera nettopp det. Difor har me no lagt ein god innsats på dette med at folk skal få sjansen til å førehandsrøysta rundt omkring i kommunen, fortset Næs.

Høyland legg til at det kjem til å bli ei travel tid framover.

– Det er mange stader me skal innom, seier ho.

Fleire tiltak

Førehandsrøystinga startar torsdag, 10. august og varer til 8. september, og det skal ikkje stå på mogelegheitene for å få røysta ved dette valet. I jakta på høgare valdeltaking stiller kommunen med eit godt utvida tilbod.

Nytt for året er valbuss og høve til å utøva stemmeretten sin på utvalde butikkar og kjøpesenter.

– Valbussen, som eigentleg er bokbussen, kjem til å køyra til Austrepollen, Varaldsøy, Borgundøy og Åkra. Me kjem også til å setja opp stand på nokre utvalde butikkar rundt i kommunen, det vil seie Spar i Uskedalen, Sæbøvik, Hatlestrand og Eurospar Rosendal. I tillegg til at me kjem til å ta turen til KVV, fortel Næs.

– Det blir same dagen som skulevalet 4. september. Då kjem me til å reisa dit slik at dei med stemmerett får høve til å stemma der, forklarer Høyland.

Heimestemming

Kommunen har også fått laga til nokre valvideoar som blir lagt ut på kommunen si heimeside, samt skjermar kringom blant anna på rådhuset. På videoane framfører leiarane frå eldrerådet og ungdomsrådet dikt skrivne av Arne Torget.

– Dette er meint å vera folkeleg og porøst, både for å folkeleggjera valet, men også for å syna til både den eldre og yngre garde at alle sine røyster er viktige, seier Næs.

Utanom desse nye tiltaka, kjem det framleis til å vera fire faste plassar ein kan førehandsrøyste; Rosendal, Husnes, Hatlestrand og Halsnøy.

– Me kjem sjølvsagt også til å ta turen til alle aldersheimar og institusjonar, i tillegg til at ein kan be om heimestemming, seier Næs.

– Då kjem det nokre valfunksjonærar heim til deg, slik at du får stemt der. Dette må ein gje beskjed om innan seinast 8. september, men det er inga krav om at ein må grunngje at ein er så og så sjuk, legg han til.

Stemmerett

Det er også verdt å friska opp minnet om kven som faktisk har stemmerett ved kommune- og fylkestingval i Norge, for det er nok fleire enn mange trur. Det er nemleg fleire som kan stemme ved kommunestyreval enn ved stortingsval.

Som det står på valg.no sine sider, så har personar som oppfyller desse krava stemmerett:

• Norske statsborgarar som har fylt 18 år innan utgangen av 2023, som er eller har vore registrert i folkeregisteret som busett i Noreg.

• Statsborgarar i Danmark, Finland, Island eller Sverige som har fylt 18 år innan utgangen av 2023, og er registrert i folkeregisteret som busett i Noreg seinast 30. juni 2023.

• Personar som ikkje er norske statsborgarar, men som har fylt 18 år innan utgangen av 2023 og har vore registrert i folkeregisteret som busett i Noreg dei tre siste åra før valdagen.

Valkort og legitimasjon

Når ein skal røyste er det viktig at ein har med godkjend legitimasjon, men det er også ein fordel å ha med seg valkortet då det vil gjera heile prosessen både kjappare og enklare. Det er også greitt å notera seg at valkortet no kjem digitalt, og du treng ikkje skriva det ut for å ta det med.

– Det er nokon som har reservert seg mot det og dei vil få valkortet på papir, men alle andre treng berre å ta det med på mobilen. Valkortet blir skanna digitalt via ein strekkode, forklarer Høyland.

Ved tidlegare val så har det vore krav om det dersom nokon treng hjelp inne i avlukket, så er det valfunksjonærane som skal gjera det.

– Dette er også noko som er nytt i år. Folk kan få velja medhjelparen sin sjølv dersom dei av ulike grunnar har behov for hjelp, seier Høyland.

Ingen stryking

Når ein så er inne i avlukket for å nytta stemmeretten sin, er det kanskje nokon som hugsar tida då ein kunne stryka ut kandidatar ein ikkje ville ha med. Dei dagar er diverre tala for lenge sidan.

– Det ein kan gjera derimot er å gje personpoeng ved å krysse av i ruta ved dei aktuelle kandidatane. Ein kan også leggja til kandidatar frå andre parti i eit eige felt på røystesetelen. På fylkestinglista kan ein berre gje personpoeng, fortel Næs.

Noko anna som har blitt endra sidan førre kommunestyreval er kapasiteten. Ved førre kommunestyre- og fylkestingval vart det enkelte stader eit stort press på kapasiteten og det utvikla seg lange køar. To år seinare, ved stortingsvalet, vart dette justert opp og kapasiteten vart auka.

– Me dobla kapasiteten ved å kjøpa inn fleire datamaskiner og valavlukke ved stortingsvalet to år seinare, og det gjekk då veldig fint. Så kapasiteten skal vera bra, fortel Næs vidare.

Trass i dette utvida tilbodet kring førehandsrøysting, vert det sjølvsagt også høve for å venta med å røysta til sjølve valdagane 10. og 11. september for dei som helst ynskjer det. Informasjon om alt dette kan ein finne både på Kvinnherad kommune sine heimesider og på valdirektoratet si side, valg.no, men dersom ein likevel har spørsmål;

– Så er det berre å ringa, understrekar dei valansvarlege.