Snart kan du tinga taxi via app i Kvinnherad

1. januar vert Taxi Kvinnherad ein del av Stord Taxi. Seinare same månad vert det mogleg å tinga bil med applikasjonen til 07000.

– Vi går over til Stord Taxi frå og med 1. januar. På sikt, forhåpentlegvis ein gong i løpet av januar, så vert vi også ein del av 07000-systemet. Som betyr at kundar i Kvinnherad kan bestilla taxi via ein app på sin telefon, seier Irene Engelsen i Taxi Kvinnherad.

Samarbeidet skjer for at Taxi Kvinnherad skal bli ein del av ein større paraply, og med det stå sterkare i ulike anbodsprosessar.

Men sjølv om det i løpet av januar vert mogleg å bestilla taxi via ein mobilapp, vert det framleis mogleg for dei utan smarttelefon å nytta seg av dei velkjende telefonnummera 91781000 i Rosendal og 91782000 på Halsnøy og Husnes.

– Det er veldig viktig å få fram. Med app blir det enklare for dei som er vane med smarttelefon og appar å bestilla seg bil, men for dei som ikkje har smarttelefon og som av ulike grunnar ikkje er trygge på appar, så vert det framleis mogleg å ringa dei kjende telefonnummera våre for bestilling, seier Irene.