Snart framme ved Halsnøy
OPPDATERT: Giganten "Dockwise Vanguard" nærmar seg Høylandsbygd. Om bord er det 46.000 tonn tunge og 200 meter høge understellet til Aasta Hansteen-plattforma.
Verdas største tungtransportfartøy "Dockwise Vanguard" er på veg til Høylandsbygd. Torsdag morgon låg skipet i Den engelske kanal, rett utanfor Brighton. Farten var då 10,2 knop, og i følgje estimata til nettstaden marinetraffic.com vil ein nå Leirvik seint laurdag kveld.
- Vi hadde håpa at dei skulle klara det innan kontortida på fredag, men det vart for mykje motvind på den siste delen av reisa. Slik det ser ut no kjem skroget til Stord søndag morgon, opplyser Statoil sin pressetalsmann, Eskil Eriksen, i 12-tida torsdag.
Artikkelen held fram under annonsen.
Skipet drog frå verftet i Ulsan i Sør-Korea den 21. april. Føre låg ei reise på 14.500 nautiske mil, mellom anna rundt Kapp Horn i Sør-Afrika.
- I Høylandsbygd skal sjøsikringa fjernast og understellet flyttast av transportskipet. Konstruksjonen vil liggja horisontalt nokre veker etter at den er komen av transportskipet. Etter dette skal den tauast til Klosterfjorden, kor den skal ballasterast og stillast på høgkant, sa Eskil Eriksen, til Grenda i april.
I ein annonse i dagens Grenda skriv Statoil at alle er velkomne til Høylandsbygd for å sjå på operasjonen, men bed samstundes om at ein held trygg avstand.