Snakka varmt om Barnevernet

Statsråd Kjersti Toppe (Sp) var som kjent i Rosendal på tysdag. Då tok ho seg mellom anna tid til å setja seg ned med Levekårsutvalet for ein uformell drøs.

– Det er fyrste gong eg er invitert til eit slikt utvalsmøte, sa 57-åringen som framleis kunne kalla seg barne- og familieminister.

– I alle fall inntil vidare. Det er litt spennande tider, men eg har ikkje noko eg kan dela med dåke. Eg er litt spent sjølv, smilte ho.

Stilt til veggs

Hennar ansvarsområde i regjeringa omfatta til dømes barn, familiar, kyrkjer, Bufdir-midlar og Barnevernet. Sistnemnde skulle bli hovudtema under møtet.

– Eg synest det er ein kjempeviktig del av politikken, men det er altfor lite snakk om Barnevernet på den positive måten, det skal liksom berre fungera. Eg har delteke i mange valkampar, både til kommuneval og stortingsval, men har aldri blitt stilt til veggs og spurd «kva vil du med Barnevernet?», medan eldreomsorga blir ein spurt om heile tida. Vi skulle hatt Barnevernet meir på dagsordenen, analyserte Kjersti Toppe.

– I Kvinnherad har vi Barnevernet på besøk i Kommunestyret kvart år, opplyste Hanne Kristensen (H).

– Det var kjekt å høyra, sa ein interessert statsråd.

Heidi Bolette Jakobsen (INP) følgde opp tematikken.

– Korleis vi snakkar om Barnevernet er utruleg viktig, sa ho og viste til at mange har negative førestillingar om Barnevernet basert på ting dei ser på TikTok og andre nettstader.

Matthias Zimmermann (MDG) var heilt samd.

– Vi må avdramatisera Barnevernet. Det er mange som har vrangførestillingar om dei, og det må vi koma vekk frå, understreka han.

Tok ikkje sjansen

Kjersti Toppe viste til at det særleg i innvandrarmiljøa ofte er mistillit til Barnevernet. Som døme delte ho historia om ein indar med høg utdanning som ikkje tok sjansen på å flytta til Norge. Han trudde nemleg at viss ikkje kvar unge har eige rom, så ville Barnevernet koma. Det same viss eine ungen leika ute åleine.

– Barnevernet blir ofte kritisert både for å gjera for lite og for mykje, sukka Toppe.

– Og så kan dei ikkje forsvara seg på grunn av personvernet, la Beate Hannisdal (V) til.

Kjersti Toppe informerte elles om at Barnevernet slit med rekruttering av personale, og slo fast at det nok er ein krevjande jobb å stå i over tid.

Julie Holmedal Askeland (Sp) kunne elles fortelja litt om Valekrossen skule, som tek i mot ungdomar med psykiske problem. Det var eit innspel som gjorde statsråden veldig nysgjerrig.

– Dette må eg få høyra meir om neste gong eg er her, bad ho.