Smidde ny kyrkjeport

Kollekta frå ei gravferd vart donert til ny port ved Varaldsøy kyrkje. Rosendal Marina smidde han til.

– Den gamle var tung og lite eigna, og då me vart tilbydde å bruka kollekten etter ei gravferd til ny port, takka me ja, fortel Hildur Øvsthus i soknerådet på Varaldsøy.

Men å finna ny port innanfor ei løyseleg økonomisk ramme, var verre.

– Me såg på smijernsportar på nettet, og vart eigentleg skremte over kostnaden. Dei som donerte pengane tipsa oss om at Rosendal Marina kanskje hadde sjans til å laga porten. Der vart me møtt med stor velvilje, seier Øvsthus.

 

Kristogram

Ei skisse vart utarbeid av Ove Sæbø, medan Sven Syversen og Svein Jarle Mehl ved Rosendal Marina har gjort arbeidet. Sæbø har vore tidlegare vore smed, og har mellom anna gjort utsmykkingsarbeid i kyrkjegarden i Rosendal.

– Han er ein kapasitet i faget, og me nytta han mykje som konsulent. Dette er ikkje ein rein smijernsport, men han er sveisa med smijernsdetaljar, forklarer handverkarane Syversen og Mehl.

Blant detaljane er kristogrammet, som også går igjen på messehagelen i Varaldsøy kyrkje.

– Eg tykkjer porten er veldig fin. Og så er det kjekt at han er laga lokalt. Skulle det vera noko som trengs vølast, så er ikkje hjelpa så langt vekke, meiner Øvsthus.

I tillegg til pengane frå kollekta er porten eit spleiselag mellom soknerådet og kyrkjeverja.