Smadra norgesrekorden: – Eg er nesten litt mållaus

– Det var heilt vanvitig. Eg har prøvd å toppa formen inn mot dette for å ha så gode bein som mogleg. Men ein veit jo aldri korleis ein treffer med slikt, men tydelegvis vart det blink. Det var ein perfekt dag på sykkelen, seier Vidar Mehl.

Vidar går laus på nok ein norgesrekord: – Blir skuffa om eg ikkje klarer det

Beste han har gjort

For å slå norgesrekorden på 200 kilometer tempo, måtte Vidar sykla i mål på under 4 timar og 49 minutt. Etter eit blodslit på sykkelen i Kongsvinger, tråkka ein smørblid omvikdeling over målstreken på tida 4 timar, 21 minutt og 54 sekund.

– Eg veit ikkje sikkert, men det kan fort vera verdsrekord. Eg heldt ei snittfart på 45,87 kilometer i timen, der eg var nede full stopp på sju vendingar. Det gjekk styggfort, og eg trur det er ein rekord som skal bli vanskeleg å slå, smiler Vidar.

Smilte, det gjorde han også under løpet. For både kropp, vêr og vind spelte på lag.

– Eg er nesten litt mållaus. Eg hadde ein snittwatt på over 300 i så langt tid, og føler sjølv at dette er noko av det aller beste eg har gjort. Og sjølv om det var tøft, så koste eg meg undervegs. Eg gjekk inn i ei lita boble og vart inspirert av mine eigen snittfart, det var rett og slett ein strålande dag der alt klaffa, seier han.

Går for verdsrekord

Men Vidar kan ikkje suga på den gode karamellen for lenge, norgesrekorden i 200 kilometer tempo var nemleg berre eit av to store mål Vidar har denne månaden. Til helga ventar eit nytt, heilsprøtt eventyr.

– Då skal eg prøva å setja offisiell verdsrekord i 24-timaren, seier han før han legg til:

– Uff. Eg gruer meg veldig til den, kjenner eg. Det kjem til å bli ein seig dag.

Og Vidar veit verkeleg kva han snakkar om. I fjor sommar skapte han og broren Kjetil folkefest i Omvikdalen. Ein folkefest som resulterte i 767 kilometer og ny, uoffisiell norgesrekord på 24 timar. Ein rekord som seinare same sommar vart slegen. No er Vidar klar til å ta tilbake trona, men no har han mål om å vera best i verda.

– Eg har heva målet med å gå for verdsrekord. No er alt i regi av reglar og slikt, og alt ligg til rette for at eg kan ta ein offisiell verdsrekord på utandørs bane, seier han.

Stolte, slitne og lukkelege

Kvart sekund er viktig

Med mykje tur og litt tilfeldigheit har han fått leigd Vålerbanen på Elverum denne dagen. Og skal her sykla ei fast løype på 2.219 meter.

– Verdsrekorden er like i overkant av 915 kilometer, som betyr at eg må ha 415 rundar for å setja rekord. Det er jo galskap, og eigentleg berre tullete. Så får vi håpa at det blir noko å jubla for etterpå, seier Vidar.

Han starta opp klokka ti laurdag føremiddag, og skal sykla alt det han kan 24 timar i strekk. Går alt etter planen, vert det ikkje veldig mange stopp.

– Det blir ikkje fleire stopp enn nødvendig. Eg har ikkje tid til det om det skal bli rekord. Så eg bør få til å gå på do utan å stoppa, og må ta all langing i fart. Kan vi unngå stopp, så gjer vi det. For her er det snittfarten som gjeld til slutt. Kvar minste detalj og kvart sekund er viktig, seier han.