Sløkker veglys i Sunnhordland
For å spare straum og ta omsyn til miljø og dyreliv vil no Vestland fylkeskommune sløkke veglys om natta. Fylkesveglys i Sunnhordland blir sløkt først.
Publisert
Sist oppdatert
Sidan «Ny strategi for veglys» vart vedteke 29. september har ikkje fylkeskommunen lege på latsida.
Først fjerna dei lampar på Fatland som lokalbefolkninga hadde samla inn pengar til, og no vil dei også sløkke lys langs fylkesvegane i regionen om natta.
Annonse
– Dette er eit fornuftig tiltak for å få ned energibruken. Vi må også møte dei auka straumprisane, utan at det går ut over trafikktryggleiken i stor grad, seier Jannicke Bergesen Clarke til Vestlandfylke.no.
Bergesen Clarke er leiar i hovudutval for samferdsle i Vestland.
Høgare risiko for trafikkulykker
Nattsløkking er vanleg fleire stader i Europa, og grepet vil føra til ein monaleg reduksjon i energibruken. Meir lokalt er det fylkesvegane på Bømlo, Fitjar, Stord og Sveio som vil bli sløkt i første omgang.
Annonse
I desse kommunane kan nemleg veglysanlegga styrast eksternt frå PC eller mobil. Nattsløkking i 5 timar på Bømlo vil åleine føra til eit dagleg spart straumforbruk på 750 kWh.
Sjølv om det er pengar å spara på å sløkke veglys, fører grepet samstundes til høgare risiko for ulykker. I mørket er det nemleg to gongar høgare risiko for ulykker enn i dagslys. Veglys har ein dokumentert førebyggjande effekt.
Bergesen Clarke lovar difor å vurdera alle konsekvensane av tiltaket nøye.
– Trafikktellepunkt i Sunnhordaland viser at det er låg trafikkmengd og svært få mjuke trafikantar om natta, så vi vonar dette vil vere eit godt tiltak totalt sett, seier Bergesen Clarke.
