Slo eit slag for naturvern: – Vi har eit ansvar for å ta vare på desse verdiane

I Kommunestyret for to veker sidan vart strategiplanen til den kommunale straumprodusenten Kvinnherad Energi diskutert. Mykje av debatten handla om vindkraft, men Bjørn Olav Tveit hadde også eit anna perspektiv.

– Kvinnherad Energi er eit viktig selskap for Kvinnherad kommune, og det er bra at vi har eit fagmiljø på eit så viktig felt som kraftfeltet. Strategiplanen inneheld mykje spanande, og eg har tillit til at styret i selskapet saman med ordførar og andre av kommunen sine representantar i selskapet utviklar selskapet i tråd med styringssignala frå Kommunestyret, innleia han.

Nedbygging

Deretter konsentrerte han seg om punkt 3 i strategiplanen. Der står det at selskapet skal vurdera mogleg minikraftproduksjon i Hattebergvassdraget - utan å utfordra vernestatusen i området.

– Det store biletet er at Kvinnherad har avgitt enorme mengder urørt natur for å produsera energi til nasjonen og fellesskapet sitt beste. Mange meiner vi har avgitt nok natur til dette.

Likevel føregår det ei steg-for-steg nedbygging av naturen, også i Kvinnherad, som mellom anna dokumentert av NRK i det siste, sa Tveit.

Han trekte i den samanheng fram Statkraft sitt arbeid med oppgradering av kraftverket i Mauranger som eit døme.

– Her vert uvurderlege natur- og friluftsverdiar forringa eller øydelagde, mellom anna i Kvitnadalen og området rundt Floetjødnane, eit område som har ein stor verdi for friluftslivet og som kunne hatt ein stor økonomisk verdi i framtida retta mot turisme, meinte Bjørn Olav Tveit.

Han påpeika at det nok kan finnast «ein bekk her og ei lita elv der» som kan eigna seg for kraftutbygging. Men i det store biletet slo han fast følgjande:

– Vi må ikkje gå for meir nedbygging av naturen i dei store, flotte dalane og vassdraga våre. Vi må ikkje ytterlegare redusera det framtidige potensialet for økonomisk inntening og turisme. Vi må heller ikkje forringa våre eigne særtrekk og naturmessige kvalitetar og fortrinn. Vi treng alle desse om vi skal motverka nedgangen i folketalet. Her står Hattebergvassdraget heilt sentralt, sa Tveit.

Monstermaster

Han la til:

– Vi driv no og argumenterer med nebb og klør mot Statnett sine planar om monstermaster gjennom Rosendal. Eit viktig argument her er at linjene går gjennom og tett på eit landskap og ein natur som anten er verna eller er av høg verdi. Då er det rart at vi samstundes skal vedta ein strategi for vårt eige kraftselskap som inneber utbygging i det unike Hattebergvassdraget, eit vassdrag som renn gjennom ein nasjonalpark og eit landskapsverneområde.

Bjørn Olav Tveit avslutta med å senda eit klart signal om at til styret i Kvinnherad Energi om at ei slik utbygging i Hattebergdalen ikkje er ynskjeleg.

– All kraftutbygging medfører ei forringing av naturverdiar og tap av naturmangfald. Vi har eit ansvar for å ta vare på desse verdiane til våre etterkommarar, konkluderte han.