Slit med formen før laurdagens VM-start

På eit hotell i hovudstaden laurdag kveld skal Vidar Mehl og tre andre syklistar representera Norge i verdsmeisterskapen i e-sport. Når Grenda pratar med Mehl dagen før dagen, sit han i bilen på veg mot Oslo. Men formen frå tidlegare i vinter er han ikkje sikker på at han har med seg.

– Formen var frykteleg bra lenge, men så blei den brått veldig mykje dårlegare. Eg trudde kanskje eg hadde trent litt mykje og litt for hardt, men sånn det ser ut no så har eg mest sannsynleg hatt covid-19 utan å testa positivt, seier Mehl og held fram:

– Eg har hatt alle symptom og har i ettertid slite med at kroppen ikkje har vore heilt god. Lungene er reduserte når eg tek i maks.

Mehl skal sykla med flagget på brystet i VM

Topp 10 var målet

Før formen forsvann, var målsetninga å koma blant dei ti beste i VM. Målsetninga består, men han trur det skal halda hardt.

– Eg er ikkje der eg skulle ha vore dagen før eit VM, og sjølvtilliten er rimeleg redusert etter den siste tida med trening. Det er ikkje sånn det skal følast dagen før start, men eg må berre gjera det beste ut av det og så ta ei oppsummering etterpå. Topp 10 vert nok tøft, men ein veit aldri korleis rittet utarte seg heller. Plutseleg sit ein i eit brot som går lenger enn hovudfeltet hadde tenkt, seier han.

Løpet kan ein få med seg på Discovery Plus laurdag kveld.

– Det er berre til å benka seg føre TV-en. Det er tre andre nordmenn som er med, og eg har stor tru på at dei skal gjera det bra, seier Mehl.