Slik er beredskapen ved straumbrot

Skulle straumen eller telefonsambandet forsvinna, så har Kvinnherad kommune naudløysingar.

I kommunestyremøtet før jul spurde Per Svindland (Frp) om kommunen har ein beredskapsplan når straumen eller telefonnettet uteblir.

– Som for eksempel naudaggregat på institusjonar, undra Svindland.

I protokollen frå møtet står det at institusjonane har rutinar basert på risiko- og sårbarheitsvurderingar, mellom anna knytt til straumbrot.

«Når det gjeld straumaggregat, har ein mellom anna det på Rosendalstunet (for den nye delen), Husnestunet har per i dag for den gamle delen av sjukeheimen, men der er ein i ferd med å montera nytt aggregat som dekker heile bygget. Halsnøytunet har også aggregat som dekker heile bygget», vert det opplyst.

Fire timar

Ved utfall av mobilt nett har dei fleste basestasjonane i Kvinnherad fire timar driftstid etter straumbrot.

«Naudetatar har prioriterte abonnement hos Telia/Telenor, som sikrar dekning dersom den eine leverandøren sitt nett fell ut. Vidare vil alle kunna nå naudetatane, dersom det er eitt mobilnett tilgjengeleg, uavhengig av om ein har abonnement hos den leverandøren. Ved kriseberedskap kan ein kopla til sendar som gjev innandørsdekning for 4G/5G, så lenge det er ei anna løysing som gjev tilgang til internett, står det i protokollen.

Ved utfall av både mobilnett og internett har Kvinnherad kommune satellittelefon, og ein har periodiske øvingar/testar saman med Statsforvaltaren. Kommunen har også naudnettsamband.