Slår saman ungdomsskuleklassar

Frå hausten vert to klassar på Hatlestrand ungdomsskule slegne saman for første gong. – Det er sjølvsagt ikkje noko vi er glade for, men det er slettes ikkje for å spara pengar. Dette handlar kort og godt om elevtal, seier rektor Edvard Jarle Tveit.

Samanslegne klassar har lenge vore vanleg på barneskulen på Hatlestrand, men det har aldri skjedd på ungdomsskulenivå før. No skal 8. klassen og 9. klassen bli éin klasse.

– Dette blir ei heilt ny verd for elevane, seier rektor.

Den nye klassen får to kontaktlærarar, og skulen ser for seg ei deling i basisfaga norsk, engelsk og matte. I andre fag vil dei få undervising i same klasserom, men ha ulike opplegg.

– Vi må tilpassa undervisinga etter dei ulike elevane i ein vanleg klasse også, men no vert det ei ny utfordring, seier Tveit.

 

For få barn

– Vi har høyrt frå foreldre i fjorårets 8. klasse at du sa at dei ikkje kom til å bli slegne saman med nokon på ungdomsskulen?

– Det kan eg ikkje hugsa å ha sagt. Eg har tvert i mot sagt lenge at vi går mot ein fådelt ungdomsskule. For eit par år sidan såg vi at dette blir framtida. Vi unngår det ikkje, meiner Tveit.

– Men med to løna kontaktlærarar sparar ein vel ikkje så mange kroner på å slå klassane saman?

– Vi sparar mange timar i veka. Ein rammetime kostar 30.000 kroner, seier rektoren.

– Så dette handlar om at kommunen skal spara pengar?

– Nei, det er slettes ikkje for å spara pengar, dette handlar kort og godt om elevtalet. Løpet er køyrd her på Hatlestrand. Det vert fødd for få born, og vi må ha ei stortilflytting om vi skal få fulle klassar. Dessverre er det ingen veg utanom å slå saman klassar, konkluderer Tveit.