Slår ring rundt bassenget og symjeopplæringa i Rosendal

Oppmodinga om å møta opp ved bassenget i Rosendal går til alle foreldre, born og andre som er interesserte i å ivareta ei god og trygg symjeopplæring i Kvinnherad. Klokka 16.00, tysdag ettermiddag, vil dei oppmøtte, i kledd redningsvestar, slå ring rundt bassenget.

«Kvinnherad har vatn på alle sider, og borna i Kvinnherad må få fyrsteklasses tryggleik og opplæring i vatn. Symjing er det faget i skulen ein kan døy av å ikkje meistre. Vi slår alarm om nedskjeringane som er vedtekne frå hausten 2021.» skriv dei i ei pressemelding.

I pressemeldinga vert det presisert at det er behov for meir tid i basseng enn det politikarane no har lagt opp til i planen som vart sendt til heimane før helga. Sjølv om dei er samde i at elevane også treng symjeopplæring ute i naturen.

Redusert symjeopplæring frå hausten av

Anne Lamberg Opsahl er Fau leiar ved Malmanger skule. Saman med Kurt Dahl, FAU representant for 4.trinn ved Malmanger, og Robert Sundal, FAU representant for skulekameratane i Omvikdalen barnehage møtte Grenda for ein prat utanføre bassenget i Rosendal. Mobiliseringa byrja i helga, kor fleire reagerte på skrivet som var blitt sendt ut. Det vart raskt avgjort at noko måtte gjerast.

– Vi meiner at politikarane kjem med eit uforsvarleg tilbod i forhold til kompetansemåla. Vi trur rett og slett ikkje at måla vil bli nådd slik planen no er, slår Lamberg Opsahl fast.

Sosiale skilnadar mellom elevane

Vidare trur dei at denne planen vil føra til store sosiale skilnadar mellom familiane som har tid, råd og interesse for symjing, og familiane som ikkje har desse ressursane. Dei peikar på at Kvinnherad er ein sjønær kommune, der det burde bli større fokus på symjeopplæring enn at tilbodet no vert redusert. At planen som er lagt fram gir eit likeverdig tilbod til alle elevane er dei heller ikkje samde om. Mellom anna vil dei som er tilknytt Husnes ha større moglegheit til å gå i bassenget på fritida, då det skal vera i drift i ni månadar, mot fem til 6,5 månadar ved dei andre bygdene.

– Skulle ein lagt til rette for meir symjeopplæring ute er heller ikkje sesongen særleg lang, og det krev også utstyr som våtdrakt, som også skapar skilnadar. Og opplæringa vert heller ikkje den same som i basseng, supplerer Kurt Dahl.

FAU representantane fryktar at symjieopplæringa vil bli ein arena kor elevane heller vil kjenne seg mislukka enn å vera ein arena for meistringskjensle. Tryggleik fører til læring, står det i dei overordna vedtektene til skulen, og vedtaket om redusert symjeopplæring er eit skritt i feil retning, hevdar dei.

– Ressursane skulen har er allereie tynt utsmurte, og dette kuttet legg meir av ansvaret over på lærarane. Dette fryktar vi også skal gå ut over opplæringa på dei andre områda i skulen. Vi vil visa at no er det nok, no må dei slutte å kutte i skulen! melder den engasjerte FAU leiaren ved Malmanger.

Lite attraktivt

– Som innflyttar kan ein også skyta inn at det vert mindre attraktivt å flytte til kommunen når slike tilbod blir reduserte, legg Dahl til.

Han siktar vidare til den kostbare oppvekstplanen som nyleg vart skrinlagt, og peikar på at pengane som vart brukt der hadde kome betre til nytte dersom dei hadde blitt brukt på borna, til dømes til symjeopplæring.

Medan det er nasjonalt fokus på symjeopplæring og tryggleik i vatn, ser dei det som merkeleg at det vert kutta i Kvinnherad. Dei refererer til Nrk sitt program, «Hele Norge svømmer» der det kjem fram at landets tiåringar er dei dårlegaste til å symje i Norden. Det er berre 41 prosent av elevane i denne alderen som kan symja 200 meter eller meir. Dette er det dårlegaste resultatet sidan 2003, i følgje ei ny undersøking Ipsos har gjort for Norges Svømmeforbund og Redningsselskapet. I denne undersøkinga oppgir 39 prosent at dei meistrar kompetansemålet på 4.trinn.

Det vert oppmøte til folkeaksjonen frå 15.30, og FAU-leiarane oppmodar dei som møter om å halda avstand og ivareta smittevernsreglane. Målet er å slå ring rundt bassenget i symbolsk og bokstaveleg forstand.

– Det er kjempeviktig at vi har eit godt tilbod om symjeopplæring i Kvinnherad, avsluttar Sundal.

Ønskjer ikkje fleire ulukker

Solfrid Siqveland, som sendte ut pressemeldinga om aksjonen, minner dessutan om drukningsulukka i Husnes båthamn i fjor sommar, og viser vidare til drukningsstatistikken. I følgje Redningsselskapet døydde det 88 personar i 2020 som følgje av drukning. Dette var to fleire enn året før. Fram til juni i år har 23 personar drukna.

Folkeaksjonen «Lær meg å symje» er signert av Marit Bakke, Leiar FAU Omvikdalen Skule, Lene Vangberg Monsen, Leiar FAU Omvikdalen barnehage, Oddmund Lunestad, Leiar FAU Uskedalen barnehage, Isabell Stensletten, Leiar FAU Uskedalen Skule, Kjell Harald Tungesvik, Leiar FAU Dønhaug Gardsbarnehage, Solrun Saghaug Vågen, Leiar FAU Åkra Oppvekstsenter, Signe Bondhus Jensen, Leiar FAU Mauranger oppvekstsenter, Lise Egeland, Leiar FAU Rosendal FUS barnehage og Anne Lamberg Opsahl, Leiar FAU Malmanger skule.