Skyss varslar om dårleg drikkevatn på Utåker

I slutten av september sendte Vestland fylkeskommune ved transportselskapet Skyss brev til Kvinnherad kommune om vasskvaliteten ved Utåker ferjekai.

«Ferjesambandet har ein forhaldsvis stram rutetabell, og det har vore praksis at sambandet har nattstasjon ved Utåker ferjekai. I denne samanheng har mannskapet vanlegvis fylla ferskvatn på denne kaia. I løpet av året har me motteke varslingar frå ferjereiarlaget om at vasskvaliteten har vore under minstemålet for drikkevatn», skriv Skyss.

Reiarlaget dei viser til, er Boreal, og ferja som går i sambandet heiter MF «Matre».

Skyss slår fast at det er lite rom i rutetabellen for å fylla vatn på andre kaiar enn Utåker ferjekai etter siste innkomst.

«I so fall må rutetabellen endrast, og dette vil nok føra til at ein får færre avgangar enn i dagens rutetabell. Ei slik løysing er ikkje å føretrekkja. Med ovannemnde problemstilling i mente, så lurer vi på om kommunen kan tilbakemelda om det finst planar for å gjennomføra tiltak for å betra vasskvaliteten tilknytt ferjekaia», spør Skyss.

Forprosjekt

Egil Eide, einingsleiar Vatn og avløp i Kvinnherad kommune, stadfestar at det av og til er utfordringar med kvaliteten på drikkevatnet frå Utåker vassverk. Utåker vassverk har ei mindre vasskjelde med overflatevatn, som kan verta påverka av årstider og ferdsel av dyr i nedslagsfeltet.

I eit svar til Skyss skriv Eide at kommunen no har bestilt hydrogeolog frå Norconsult. Dette for å vurdera ny drikkevasskjelde (grunnvatn), slik at ein kan få sikrare og meir stabil vassforsyning på Utåker. Dette arbeidet startar i haust. Vert resultatet positivt, vil kommunen laga eit forprosjekt om eit nytt vassbehandlingsanlegg, og leggja desse planane fram for politisk handsaming.

«Kvinnherad kommune har planar for å betra vasskvaliteten, men per i dag er det ikkje løyvd pengar til tiltaket. Det betyr at det vil ta litt tid før me eventuelt har «nytt» vatn til abonnentane på Utåker», avsluttar Eide.