Skyhøgt nivå på sommarskule

Sommarskulen starta som ein sommarleir for strykarar på Bømlo i 1981. Denne utvikla seg til eit årvisst orkesterkurs for alle instrument ved Olavskulen (noverande Bømlo Folkehøgskule). Sidan 1994 har sommarskulen vore arrangert ved Sunnhordland Folkehøgskule på Halsnøy. Kvart år samlar det seg dedikerte, unge orkestermusikarar i alderen 12 til 24 år, og i år var ingen unntak.

Då Grenda var innom Sunnhordland Folkehøgskule torsdag, var det rundt 90 orkestermusikarar å sjå. Dei var delte opp etter alder og kor langt dei har kome på instrumenta sine. I ungdomsorkesteret kan ein vera med til ein er 16 år, etter det må erfaringa visa om ein kan ta del i Symfoniorkesteret.

Sterk tilknyting

I år var det tre leiarar frå styret i UNOF, instruktørar og nokre foreldrevaktar som hadde ansvaret for at alt gjekk som planlagt. Instruktørane kjem att kvart år frå heile landet for å dirigera orkestera.

– Me føler oss privilegerte som får lov å arrangera sommarskulen på Halsnøy i år. I fjor vart det ikkje, grunna smittevern. Då arrangerte me det i Bergen, og det gjekk strålande. Men det er noko ved Halsnøy. Det gode miljøet og dei flotte omgjevnadane. Deltakarane har ei sterk tilknyting til denne staden, fortel Kjetil Motys, ein av leiarane på sommarskulen.

Stortalent frå Skorpo

Ut frå hovudbygget kjem fiolinisten Nikolai Vågen (16) blid og imøtekommande, sjølv etter mange timar øving, også kalla tutti, saman med symfoniorkesteret. Denne ungguten kjem frå Skorpo i Kvinnherad, og har eit imponerande musikktalent.

– Det er så flott at sommarskulen vart arrangert, sjølv om det er ein pandemi som herjar rundt i verda. Me ungdommar treng dette i ein elles tung og annleis kvardag, seier Vågen medan han set seg ved sida av meg.

Nikolai byrja å spela fiolin allereie som åtteåring. Då vart han inspirert av nydeleg fiolinspel på fjernsynet.

– Eg blei skikkeleg inspirert, og ville byrja sjølv. Det ligg mange øvingstimar bak, sjølv om eg ikkje er så glad i akkurat det. Eg likar best å framføra. Her på sommarskulen øver me sju timar kvar dag, men det er kjekkare då me er saman om det. Og dirigenten vår, Kjell Sein, han er fantastisk dyktig. Eg utviklar meg som fiolinist kvart einaste år, fastslår han.

Konsert i Grieghallen

Om Nikolai vil arbeida med musikk i framtida er uvisst, for nett no har han heilt andre planar. Han skal nemleg byrja på maritim elektro i Bergen, men skal i tillegg fortsetja å spela med Vestnorsk ungdomssymfoniorkester og Sunnhordland Kammerorkester.

– Det blir kjekt å starta på noko nytt. Elektro er noko eg har tenkt på lenge, og elektrikar er det eg ynskjer å bli. Musikken er berre ein hobby, men det er gøy det også. Me skal mellom anna ha konsert i Grieghallen på søndag. Det blir ein flott avslutning på ei fantastisk veke, slutta han.

Huskonsert

Utanom dei mange øvingstimane, finn deltakarane på mykje lått og løye. Ulike leikar, bordtennisturnering, fotballkampar (strykarane mot blåsarane), kortspel og forskjellege småkonkurransar. I tillegg arrangerer akkompagnatør Ole Christian Haagenrud huskonsert i løa kvar kveld. Han blir rekna som ein av dei mest lovande unge pianistane i Norge i dag.

– Her finn me på alt mogleg. Me arrangerer mellom anna felles bading tre gongar til dagen, både tidleg om morgonen, midt på dagen og på kvelden. Dette er dog for dei mest dedikerte deltakarane, blunkar leiar Berge Osnes og legg til:

– Huskonsert er for mange dagens største høgdepunkt. Alle som ynskjer kan framføra, anten som solist eller saman med andre. Det blir vist fram både tryllekunst, sketsjar og fantastisk musikktalent. Salen vert kvar kveld fylt med god stemning og ståande applaus.