Skulpturar og dikt i Galleri Banken

Kunstnar, psykiater og forfattar Hans Erik Sande har gitt ut ei rekke bøker i forskjellige sjangrar og har som biletkunstnar illustrert fleire av dei sjølve. Sidan 2014 har han jobba med pianoskulpturar.

– Det var litt slumplukke at eg byrja med piano. Yngste bror min ringte og sa at naboen haldt på å knusa eit piano og at han hadde sagt «vent litt, kanskje Hans vil ha det», og det sa eg jatakk til, fortel Sande, og legg til;

– Eg tok med meg pianoet heim og byrja å plukka det enno meir frå kvarandre.

Nyleg fekk han eit tips om at han måtte søkja om å stilla ut i Galleri Banken i Ølve. Då fekk han tenning igjen.

– Då byrja eg igjen og laga tre skulpturer til, så no har eg 13 stykke pluss ein pianofamilie med mor, far og unge, fortel kunstnaren og legg til;

– Det er fyrste gong pianoskulpturane blir vist fram, så dette er ei stor hending for meg.

Både utstilling og bokslepp

Laurdag er det altså utstilling, men kunstnaren slepp også ei ny diktbok same dag.

– Plutseleg skreiv eg dikt som passa til skulpturane. Dei kom ramlande, og det er minst eitt dikt til kvar skulptur, fortel Sande.

Silvia Karlsen på Skag Profilera har designa og fått trykka boka, som vart til på veldig kort tid.

– Eg fekk melding om at boka er ferdig i morgon klokka 10, så dette er heilt ferskvare, fortel kunstnaren.