Skulle berre røykje mat
Det som fyrst vart meldt som brann i eit skur, skulle syna seg å ikkje vera særs dramatisk likevel.
I 11-tida i dag skreiv Grenda at politiet på Twitter hadde meldt om brann i Geitavika i Ytre Matre. Ved nærare undersøking på staden vart det klart at det heldigvis ikkje var snakk om brann, men om stor røykutvikling i samband med røyking av mat.
– Slik det framstår for oss no har dette vore ei kontrollert brenning som har ført til stor røykutvikling. Bygningen det er snakk om har blitt brukt til dette føremålet i ei årrekkje, og det er ingen skadar på bygningen verken utanpå eller inni. Slik me ser det no så var det ikkje fare for spreiing, fortel politiet på telefon onsdag ettermiddag.
Annonse
Vidare opplyser politiet at dei har prata med eigaren og blitt einige om ulike tiltak for å sikra trygg opptenning og varsling for å unngå framtidige utrykkingar og for at folk som kjem dit skal skjøna kva som føregår.
Det vert ikkje oppretta sak.
