Skuleturar med Gurine blir utsette

Som omtala tidlegare har Interesselaget for Galeas Gurine inngått ein avtale med Kvinnherad kommune om å vera ein del av den kulturelle skulesekken. Desse turane er inntil vidare utsette.

– Interesselaget har fått kjennskap til at det er uttrykt tvil om Gurine oppfyller dei krava som skal oppfyllast for at ein kan gjennomføra slike turar med elevar. Me har gjort våre vurderingar, og er trygge på at Gurine oppfyller dei krava som stillast til denne typen aktivitet, skriv Anders Jordal i ei melding.

Nytt regelverk kjem

Styreleiaren for Interesselaget for Galeas Gurine påpeikar at regelverket er komplisert, og det er mange ulike tolkingar og praksisar i miljøet.

– Dette er òg noko Sjøfartsdirektoratet har påpeika, og difor har dei tatt initiativ til å laga eit enklare regelverk som truleg vil tre i kraft i 2023, forklarer Jordal.

Fram til det nye regelverket er klart har Sjøfartsdirektoratet laga ei ordning der ein kan søka om dispensasjon.

– Me blei nyleg gjort merksame på denne ordninga. Sjølv om me var usikre på om det var naudsynt for oss å søkja – i og med at «Gurine» er registrert som fritidsfartøy – valde me likevel å søkja om dispensasjon. Etter ein gjennomgang av krav som stillast for å få dispensasjon ser vi at Gurine oppfylleralle krav. Gurine har alt av sikkerheitsutstyr med redningsflåtar, redningsvestar, mann-over-bord-båt og anna sikkerheitsutstyr som er påkravd, melder Jordal vidare

Ventar på svar

Interesselaget for Galeas Gurine har enno ikkje fått svar på søknaden om dispensasjon. For å unngå at det oppstår usikkerheit blant elevar og føresette, ser dei seg nødt til å utsetja turane med elevar til dei har fått svar på søknaden frå Sjøfartsdirektoratet.

– Me er leie oss for at turane blir utsett, men vil leggja opp til gjennomføring av turane når ting er avklart. Å ta med elevar ut på fjorden, og formidla kystkultur og aktivitetar er kanskje det aller mest meiningsfulle Gurine kan bidra med. Me er svært glade for å ha fått til dette samarbeidet med kommunen i regi av Den kulturelle skulesekken, seier Jordal.