Skulen i Høylandsbygd til sals

Kvinnherad kommune har no lagt Hauge skule i Høylandsbygd ut for sal.

Høylandsbygd bygdalag har takka nei til å overta Hauge skule, og kommunen har no lagt bygninga ut for sal. Ifølgje salsoppgåva er grunnflata på 1372 kvadratmeter, medan samla areal utgjer 1890 kvadratmeter. Tomtearealet er på heile 3401 kvm. Bygninga er frå 1940, men vart renovert i 2003.

«Hauge skule er ein skule som er bygd ut i fleire etappar. Gamleskulen blei bygd i 1940. Nytt skulebygg blei bygd saman med gamleskulen i 1974, og i 2003 blei det bygd ny barnehage som tilbygg til den eksisterande skulen. Bygget er sist brukt som barnehage. I dag er det berre tilfluktsrom som er i bruk. Dette vert brukt til innandørs skytebane av Høylandsbygd skyttarlag», vert det opplyst.

Prisantydinga er på 1.990.000 kroner.

Så får vi sjå om det går like raskt å selja Hauge skule som den førre skulebygninga kommunen la ut. Brekke skule på Borgundøy vart seld i sommar, men til ein langt lågare pris enn estimert. Prisantydinga var på 300.000, medan sluttsummen enda på 30.000.