Skuleløp i staden for haustmarsj

- Me følte at haustmarsjen var veldig kjekk, men at ungane ikkje heilt kunne definera akkurat kva dei gjorde for TV-aksjonen. Med dette skuleløpet gjer dei ein svært tydeleg innsats, fortel Hanne Hesjedal, lærar ved Malmanger skule.

Elevane har vore rundt til lokale bedrifter for å samla sponsorar til løpet. Dette har gjort det lettare å engasjera ungane. Dei som vel å bli sponsorar, får logoen sin eller andre reklameartiklar synleg under løpet. Til gjengjeld skal dei betala ein viss sum for kvar runde elevane klarar å springa rundt løpebana på Rosendal stadion.

Meir fokus på saka

- Me har levert informasjon om dette til bedriftar som er plassert sånn omtrent innanfor Malmanger skulekrins. Om nokon ikkje har blitt invitert til å bidra, er dei sjølvsagt likevel velkomen til å bli med på å vera sponsor, det er berre å ta kontakt med skulen, forsikrar Hesjedal.

Løpet føregår i skuletida, som også gjer det lettare å organisera, sidan det då ikkje kræsjar med fritidsaktivitetar eller andre hendingar. Hesjedal meiner også at fokuset på saka kan verta endå betre med denne ordninga enn i den tidlegare haustmarsjen.

- Kanskje det vart litt uønska fokus på kor mykje pengar kvar enkelt familie kunne gje. Dette kan vera sårbart for nokon. Privatfamiliar kan heller gje til bøssebærarane under TV-aksjonen, så kan bedriftene gje sine bidrag gjennom elevane sin løpsinnsats, forklarar Hesjedal.