– Skuffande at arbeidet ikkje er gjort ferdig

I formannskapsmøtet på torsdag vart ferdiggjering av kyrkjegarden på Husnes etterlyst.

I spørsmålsrunden nytta Ove Lemicka (Frp) høvet til å stilla eit spørsmål om kyrkjegarden kring Husnes kyrkje.

– Det er eit svært flott anlegg med fine moglegheiter for ettertanke og sorg, som vi kan besøkja når vi treng det eller ynskjer det. Omlag 18 millionar kroner er investert dei siste åra for at denne fine plassen kan framstå slik den er i dag. Imidlertid er det skuffande at arbeidet ikkje er gjort ferdig fleire år etter ombygginga. Gjerdet som omkransar den fine kyrkjegarden står uferdig og umåla, og slik kan det ikkje vera, sa han.

Lemicka undra difor om ordføraren kan syta for at entreprenøren ferdigstiller anlegget med måling?

– Dersom dette ikkje er med i entreprisen som Mesta hadde, kan ordføraren syta for at vedlikehaldsavdelinga til kommunen fiksar dette før hausten kjem? Kostnadane skulle ikkje vera store og det må utførast, kommenterte Lemicka.

– Dette skal eg undersøkja og ta tak i, responderte ordførar Hilde Enstad (Ap).