Skuffa over vedtaket om «armen»

Per Svindland er svært skuffa over Statens vegvesen si tilråding i saka om veg til Bergen. Frp-kollega Per Kristensen vil no satsa alt på innkorting av ferja til Stord.

På stand i Rosendal laurdag, stilte Framstegspartiet med to blad Per. Men det er ikkje berre førenamnet dei har felles; begge er også særdeles interesserte og engasjerte i dei store samferdslespørsmåla.

Per Svindland frå Varaldsøy har jobba hardt for at armen til Bergen skal gå over nettopp Varaldsøy. Men fredag fekk vi vita at Statens vegvesen har valt traseen Oddadalen, Folgefonntunnelen, Jondalstunnelen, Jondal-Tørvikbygd, Kvamskogen.

– Kva legg de vekt på her på standen i dag?

– Valfridom. Og ikkje minst samferdslepolitikk når det no vart vedteke at «armen» skal gå over Kvamskogen. 90% vil verta misnøgde med denne løysinga og berre 10% nøgde. Ingen frå Kvinnherad kjem til å reisa over Kvamskogen til Bergen, sa Per Svindland.

– Er du skuffa over tilrådinga til Vegvesenet?

– Ja, aldeles forferdeleg skuffa. Det er den lengste og dårlegaste løysinga som no er valt, meldte han.

Kortast seglingsdistanse

Per Kristensen frå Halsnøy la mest vekt på ferjeproblematikken sør i kommunen.

– Om dei hadde valt ein arm til Bergen gjennom Kvinnherad, så hadde det uansett alternativ hamna langt nede på lista i Nasjonal transportplan, og det hadde blitt mange tiår til det kunne blitt realisert. Det betyr at vi må jobba for å korta inn ferjestrekninga mellom Kvinnherad og Stord. Vi må få kortast mogleg seglingsdistanse og størst mogleg frekvens, analyserte han.

Karane trekte elles fram barnehage og skule i kvar grend som viktige Frp-saker.