Skreiv dikt om ferjeforslaget: – Kjende på ein harme

Onsdag føremiddag kunne Grenda fortelja at fylkesadministrasjonen føreslår å ta bort eine ferja frå sambandet Ranavik-Skjersholmane og det same frå Gjermundshamn-Varaldsøy-Årsnes. Ordførar Vegard Bjørnevik reagerte sterkt, og mange andre. Stuntpoet Arne Torget frå Husnes reagerte på sin mest naturlege måte; ved å skriva dikt.

– Eg kjende veldig godt at dette måtte eg berre kommentera. For eg reiser mykje og har kjentfolk nesten over alt, seier han.

Torget fortel om lange omvegar for å koma seg heim frå ulike oppdrag om kveldane. Han har køyrt via Folgefonntunnelen fordi ferja på Skånevik har teke kveld, og han har lagt kursen via Trekantsambandet fordi Skjersholmane-Ranavik var slutta å gå.

Motarbeidde

– Eg har vore skeptisk til å reisa til Hatlestrand, Ølve og Varaldsøy grunna all ferjeproblematikken der. Og eg kjenner at når eg reiser til Stord, så kan eg ikkje ta snøggbåten. Etter at Flaggruta vart lagt ned, er det ikkje råd å koma seg heim om kvelden, sukkar den bokaktuelle diktaren, som same kveld skulle til Sauda for å halda føredrag.

Og no kan det altså bli mykje verre.

– Vi er blitt sett 20 år attende i tid. Det kjennest som at distrikta blir motarbeidde av dei som eig oss. Eg synest vi har fått nok kutt, og kjende på ein harme i dag. Eg har venta lenge med å skriva eit dikt om alt dette, men no følte eg berre at eg måtte gjera det. Diktet kom nesten av seg sjølv, seier Arne Torget, som sjenerøst gav Grenda løyve til å prenta det.

Distriktsfienden Vestland fylke

Kven du er Herr eller Fru Vestland skulle eg visst og likt

og mange med meg i dine flotte blomstrande distrikt.

Og er det slik du vil stelle med distrikta dine

at dei skal vere vanskeleg tilgjengelege, men fine?

–

Du kan vita det Herr eller Fru Vestland at vi stussar

når du tek frå oss flaggruter, ferjer og bussar.

Det må hoen pitle meg snart vera nok

eller må vi komme og snakke vakse til deg i samla flokk?

–

Her snakkar vi i mange kommunar om livsnerva vår

grender og øysamfunn som lir når ferjer og båtar ikkje går.

Og no vil du leggja endå fleire ferjer ned?

Her er det kvardagen til distrikta du leikar med!

–

Slik kan vi rett og slett ikkje aksepterer meire

vi kan ikkje ha færre avgangar, vi må ha fleire!

Den usikkerheten du sprer er sjølve probleme’

skal vi tusle rundt her i bunaden i tilfelle Kongeskipet kjeme’?

–

Vi forventar Herr eller Fru Vestland at du snur

og lagar stabile og solide kommunikasjonsruter her vi bur!

Vi skal gjerne fortsetje å halde lokalsamfunna blomstrande og fine

Så skal vi fortsetje å syte for inntektene dine.

–

Arne Torget

Hyppig ferjande Vestlending