SKL vil byggja effektanlegg i Blådalen

Då Energi- og miljøkomiteen til Stortinget var på Kvinnherad-turné, presenterte SKL planane om nytt kraftverk ved Fjellhaugvatnet. Formålet er først og fremst å kunna produsera om lag same mengd kraft som no, men på kortare tid.

– Me ynskjer å byggja eit effektanlegg i Blådalen, sa direktør John Martin Mjånes og Magne Andresen då dei orienterte politikarane.

Høgare effekt

Dei nytta også høvet til raskt fortelja om situasjonen for det noverande anlegget i Blådalsvassdraget

– Me har eit kraftverk på 100 megawatt (MW) som er bygd i 1968. Med det tilsiget som magasina her har, må me ha det i gang 16 timar til dagen kvar dag i året, for at det ikkje skal renna vatn over kanten. Me opererer med 6000 brukstimar i året på dette anlegget, sa dei.

Det betyr at når det kjem meir sol- og vindenergi, som er uregulert energi, så vil dette anlegget framleis måtta gå 16 timar i døgeret, året rundt.

– Då det vart bygd, så var dette fornuftig å gjera det slik, for då bygde ein energiverk. Det me ynskjer no, er å setja inn ein større motor, slik at me kan produsera straum på kortare tid. Då me laga Blåfalli Vik i 2007, så var det eit tidleg effektanlegg, forklarte Mjånes og Andresen.

Blåfalli Vik har ein effekt på 235MW. Planen som energikomiteen fekk høyra om, involverer 12 km med tunell frå Midtbotnvatnet, 185 MW effekt på kraftverket, som å bruka dei same reguleringane er i vassdraget allereie.

– Ved å bruka eksisterande anlegg saman med det nye, då får me ned brukstida på heile vassdraget. Me vil koma ut med 1,6-1,7 TWh på 3000 brukstimar i året, meinte Andresen, som ikkje hadde registrert motstemmer til det.

Gamle planar

Planane om effektanlegget byrja i 2014, men SKL klarte ikkje å rekna heim prosjektet før i 2021, då det kom ei endring i grunnrenteskatten som gjorde det løyseleg.

– Medan me var i prosessen, så kom det ei pressemelding 28. september 2022 om høgprisbidrag på straumen. Ein meir effektiv måte å ta livet av eit slikt prosjekt på kan ein ikkje finna. Det vart gjort med imponerande presisjon, sa Morten Andresen sarkastisk til politikarane.

Han la til at SKL følgde jo med, og forstod på diskusjonane som gjekk at høgprisbidraget kom til å bli tatt bort.

– Det blei det jo, og no ligg saka hos NVE. Dei seier at me skal få svar før sommaren, sa SKL-representantane.

I skissa dei presenterte, er investeringsavgjerda planlagt tatt tidleg i 2025. Anleggstart er tenkt midt i året, medan leveringstida på transformatoren er heile tre år. Viss dei er heldige.

– Det er fleire enn oss som ynskjer å kjøpa generator og transformator. Me treng å sikra oss ein plass i køen, men det er vanskeleg før me endeleg veit at det blir bygging, understreka Mjånes og Andersen.

Går det som SKL vonar, blir det ferdig kraftverk i siste del av 2028.