SKL med 1,745 milliardar i pluss
Årsrekneskap 2022 for SKL-konsernet viser eit at året var ekstraordinært i kraftbransjen. – Kan ikkje samanliknast med noko tidlegare, kommenterer konsernleiinga.
Publisert
Sist oppdatert
I ei pressemelding frå Sunnhordland Kraftlag AS i samband med offentleggjering av årsresultatet, kommenterer konsernleiinga at året 2022 var eit veldig spesielt år for både Sunnhordland kraftlag AS (SKL) og kraftmarknaden generelt. Året har vore prega av uvanleg høge kraftprisar, mellom anna som følgje av Russland sitt angrep på Ukraina, og låg fyllingsgrad i vassmagasina i Noreg ved inngangen til hausten.
– SKL hadde derimot godt med vatn i magasina gjennom heile året og produserte til saman 2,3 TWh rein og fornybar vasskraft. Med dei høge prisane førte det til eit resultat som ikkje kan samanliknast med noko tidlegare. Resultatet etter skatt vart 1, 745 milliard kroner og omsetninga over 5,5 milliard kroner, skriv administrerande direktør John Martin Mjånes om resultatet.
Annonse
Spotmarknaden
SKL presiserer i meldinga at dei sel all kraft til prisen som til ei kvar tid er i marknaden, og at det høge resultatet er ei direkte følgje av dei høge marknadsprisane.
– Resultatet kjem våre offentlege eigarar til gode, både gjennom skattar, avgifter og utbyte, skriv dei i pressemeldinga.
Pressmeldinga viser til at SKL totalt betalte 3,3 milliard kroner i skattar og avgifter i 2022. Dei 1,1 milliardar kronene dei deler ut i utbyte kjem i tillegg til 300 million kroner som vart delt ut i haust. Mottakarane av utbytet er Haugaland Kraft (59,7%), Eviny (38,2%) og Stord kommune (2,1%).
Annonse
Haugaland Kraft er i sin tur eigd av Karmøy kommune (34,72%), Haugesund kommune (24,76%) og Finnås Kraftlag (9,54%) som største eigarar, medan Eviny har Bergen kommune (37,75%) som største eigar.
Annleisåret for kraftmarknaden
SKL gjer nokre vurderingar kring faktorane som fører til dei ekstraordinære inntektene til kraftprodusenten.
«Året 2022 vart sterkt prega av mange forstyrringar i energimarknaden i Europa. Sentrale årsaker var krigen i Ukraina med reduksjon og stans av gassleveransane frå Russland til Europa, ein svak energibalanse i Norden, hetebølge i Europa, og at mykje av Europa sin kjernekraftproduksjon enten midlertidig eller permanent var tatt ut av drift. Alle desse forholda smitta direkte inn i den nordiske energimarknaden med ein heilt ny skala av prisnivå og -svingingar», skriv SKL i pressemeldinga.
Vasskraftproduksjonen
For SKL var produksjon i 2022 på totalt 2317 GWh i SKL. Det er 19 GWh eller ca. 0,7% meir enn det som er rekna som middel produksjon. Dei konsoliderte småkraftverka hadde ein produksjon på 124 GWh, mot middelproduksjon for anlegga som utgjer 142 GWh. Avviket mot middelproduksjon skuldast hovudsakleg at dei tre nye kraftverka vart sett i drift i 2022, og har difor ikkje fullt produksjonsår, går det fram av pressemeldinga.
Annonse
Magasininnhaldet ved inngangen til 2022 var omtrent identisk med utgangen, med berre 3 GWh høgare ved utgang. Total nedbør i Matre i Kvinnherad, der SKL har sitt største anlegg i Blådalsvassdraget, vart 3581,5 mm (9 % høgare enn normalt) mot 2819 i 2021, melder SKL vidare.
