Skisserer 65 nye båtplassar

På onsdag skipa Rosendal Båtlag til årsmøte. Til nytt styre vart valt: Svein I. Opdal (formann), Oddgeir Mælen, Knut Berge Eik og Leif Nygård. Dei fekk i fanget fleire store saker, som har vore i kjømda i fleire år. Men det bekymra ikkje fyrstnemnde, som overtok etter Kjartan Wang Olsen, då han møtte Grenda fredag ettermiddag. Humøret var ekstra godt grunna storfangsten hadde nett hadde gjort rett utanfor hamna i Røynholm. Frå 100 meters djupne drog han nemleg opp fleire store havseiar; den største vog over seks kilo.

– Så det hadde vore betre om eg hadde blitt formann i fiskarlaget, smilte den nye leiaren.

Meir seriøst kan 73-åringen fortelja om planane til båtlaget.

– Det som skjer er to ting, og det fyrste er ganske alvorleg. Desse bryggene byrjar å bli veldig dårlege, det er faktisk kritisk. Så der må vi starta eit arbeid med å skifta til betong, innleiar Opdal.

Omvikdalen

Det andre saka dreiar seg om ei mogleg utviding av hamna.

– Ideen er å samla alle som står på venteliste og andre interesserte, og då ser vi Røynholm og Omvikdalen under eitt. Det er til saman om lag 55 personar på venteliste. Vi bed dei danna eit interimsstyre som skal greia ut den mogleg utvidinga, men dei må sjølve ta initiativet til eit slikt prosjekt, opplyser Svein I. Opdal.

Utvidinga er planlagt frå holmen på utsida av hamna og attende i ein slags hestesko. Laget har lodda djupna der, og funne ut at det ikkje er så djupt som ein kanskje skulle tru. Dei har difor sendt innspel til kommuneplanen om ein mogleg molo der.

– Når planen er vedteken, så kan vi søkja om løyve. Men vi får ikkje gjort noko før planen er godkjent, understrekar Opdal.

Grava ut i bakken

I denne «hesteskoen» kan det bli plass til om lag 30 nye båtplassar. Prosjektgruppa må sjølve stå for arbeidet med reguleringsplan, og ingen kostnader med prosjektet skal belastast dagens medlemmer i båtlaget.

I tillegg skal ein sjå på moglegheitene for å grava ut i bakken opp mot hovudvegen, slik at det kan bli plass til to rekker med båtar i inste del av hamna. Dette vil resultera i ei utviding med ytterlegare 35 båtplassar.

– Dette er ei veldig god hamn, som ligg godt til, konkluderer Svein I. Opdal.