Skipar til ope møte: – Det er viktig med alle innspel

Tysdag 21. november kan alle som ynskjer ta turen til Kvinnherad Arena for ein kveld med dialog om det grøne skiftet. Dette skriv leiar for Kvinnherad SV Silje Nordtveit Olsen i ei pressemelding.

– Det er viktig med opne møte for å gå i dialog med innbyggjarane om deira behov, og det er også viktig med alle innspel, seier Nordtveit Olsen i pressemeldinga.

Innleiarar og paneldrøs

Vidare står det at det blir ein spanande kveld med ei rekkje innleiarar.

– Lars Haltbrekken, stortingsrepresentant for SV og medlem i energi- og miljøkomiteen, kjem for å snakka om SV sin plan for eit rettferdig grønt skifte i Norge. Harald Maaland frå miljøstiftinga ZERO kjem, dei meiner at politisk leiarskap og eit framoverlent næringsliv er avgjerande for å løysa klimakrisa. Zero jobbar også for å møta klimakrisa med utsleppsfrie teknologiar og handlekraft, fortel Nordtveit Olsen.

– I tillegg kjem Knut Førland for å fortelja om HYDS si hydrogensatsing, samt Reinhard Lund-Mikkelsen frå Vireo kjem også for å fortelja om korleis dei vil gjera avfall til energi for ei berekraftig framtid, fortset leiaren.

Avslutningsvis vil det også verta ein paneldrøs med innleiarane om kva som skal til for at Kvinnherad skal vera ein sentral aktør og arena innan det grøne skiftet.

– Me ser fram til ein spanande og kjekk ettermiddag på Kvinnherad si nye storstove, Kvinnherad arena, avsluttar Nordtveit Olsen.