Skipar til namnekonkurranse for den nye barneskulen på Husnes

Torsdag ettermiddag kunne varaordførar Thea Vaage (Ap) og ordførar Vegard Bjørnevik (H) avsløra at dei no inviterer til namnekonkurranse. Det er nemleg ikkje sikkert at den nye barneskulen på Husnes berre skal heita Husnes barneskule.

– Me vil ha innspel frå så mange som mogleg, og forslaget kan sendast som e-post eller brev til kommunen. Det må sjølvsagt vera på nynorsk, seier Thea Vaage.

– Dette har skapt stort engasjement blant elevane på skulen, dei har alt kome med mange forslag, seier Vegard Bjørnevik.

«Ei sentral rolle»

No har dei samla ein flott jury med representantar frå både skule, politikarar, lokalbefolkning og mållaget. Denne juryen skal bli samd om eit vinnarnamn blant alle forslaga som vert sendt inn.

– Premien til den som har sendt inn vinnarforslaget er å få ei sentral rolle under opninga av skulen, seier Vegard Bjørnevik.

Kva den rolla vil vera, er nok ikkje heilt avklart. Juryen meiner det vil ha litt å seia kven det er som sender inn vinnarforslaget.

– Det er sjølvsagt lov til å føreslå Undarheim skule, eller Husnes Barneskule, om ein synest det er det beste namnet. Dersom ein vil, kan ein også senda inn forslag anonymt, forsikrar Thea Vaage.

Mohammed Dasho og Sander Stien Thorsvik ramsar opp nokre av forslaga som har kome. Harry Potter-skulen, Oppåheim skule, Trio-skulen og Kvednabekkjen skule blir nemnt.

– Det er supert med så gode forslag. Kjekt at dei som går i sjuende steg no og ikkje får gått på den nye skulen, likevel får litt eigarskap til den gjennom namneforslaga. Me i juryen skal bli samde om resultatet før jul ein gong, seier Thea Vaage.