Skiftar arbeidsplass etter 35 år – Blir fagansvarleg i Industri Energi

Normann blir Fagansvarleg for landindustriavtalane i Industri Energi, som er eit forbund i LO med 56.000 medlemmer. Desse kjem frå fire tidlegare forbund, inkludert Norsk Kjemisk Industriarbeiderforbund, som er heimebanen til kraftkrevjande industri som til dømes metallindustrien og kunstgjødsel.

– Eg får det øvste faglege ansvaret for den landbaserte delen av forbundet vårt, fortel Normann.

Hovudforhandlingane 2024

Eit medlemskap i Husnes Kjemiske Fagforening sidan 1988 blir ikkje avslutta 31. januar 2023. Men vervet som leiar for denne fagforeininga blir då erstatta med ei tilsetjing ved hovudkontoret til Industri Energi i Oslo.

– Me hadde for første gong i historia på elektrokjemisk streik i sommar. Eg har sete i desse forhandlingane sidan 2005, og sat der i år også. Konsekvensen av dette er at eg no i jobben eg har fått, skal jobba fram mot hovudforhandlingane i 2024 for å sjå om ein kan få på plass ein avtale om lokal sanksjonsrett på lokale forhandlingar, forklarer Normann om jobben han skal ta til i.

Det er eitt verk på elektrokjemisk overeinskomst som allereie har ein slik sanksjonsmogelegheit.

– Når den er godtatt av alle partar, meiner me at det må vera likt for alle. Det blir hovudoppgåva fram mot 2024, oppsummerer han.

Skal æra organisasjonen

Ørjan Normann starta ved Søral etter han var ferdig som russ i 1988, men han – som mange andre – fekk ikkje fast jobb, og gjekk på kontraktar i mange år.

– Eg fekk ikkje fast jobb før i 1998. Eg vart behandla godt, og hadde tatt fagbrev og alt, til og med maksa det som var av ansiennitetstillegg, før eg vart fast tilsett.

Når Normann går av, så gjer han det som 18 år som leiar. Årsmøtet i Husnes Kjemiske Fagforening i slutten av januar skal velja ny leiar, og først då.

– Eg vart spurd om å tiltre i Oslo umiddelbart, men det sa eg nei til. Eg er leiar for ein stor organisasjon, og då skal eg æra den fram til eit årsmøte. Eg spring ikkje av garde midt i ein periode eg er valt for, seier Normann.

Han seier det blir spennande, men også at det har ikkje vore ei lett avgjerd for han.

– Eg har hatt ganske mange tilbod opp gjennom åra, frå begge sider av bordet, og både lokalt og nasjonalt. Det har aldri passa å takka ja til noko anna, og livet består i stor grad av timing, og no passar det å gjera dette, slår han fast.

53-åringen vedgår at det har vore litt helsemessige utfordringar som blant anna har gjort at det no passar å skifta jobb.

– Det er eit verv som er altoppslukande, ein er inne med hud og hår. Stormkasta ein har vore gjennom har sett sine spor i kropp og sjel og psyke, men eg har ingen negative tankar om dette. Det er eit frivillig verv eg har hatt, påpeikar han.

Høge toppar – djupe dalar

Han fyller 54 år same dagen som han går av på årsmøtet til HKF.

– Når ein skiftar jobb, så er det greitt at ein har nokon år i den nye jobben også, enten det blir åtte eller 16 år, seier han om løpet vidare.

Normann har i 18 år jobba for sine kollegaer sine rettar, lommebok og generelle ve og vel. Dei er 340 aktive medlemmer i Husnes Kjemiske Fagforening no, inkludert 35 lærlingar.

– Det er heldigvis naturleg for alle som byrjar her at ein melder seg inn i HKF, smiler Normann.

– Ved denne bedrifta har me hatt høge toppar og djupe dalar. Me har kanskje opplevd tøffare tak enn mange andre bedrifter har, men det samhaldet som ein sit att med i etterkant av dei, den fleksibiliteten arbeidsstokken har erverva seg at er ein del av arbeidskvardagen, har vore heilt avgjerande for at ein er der ein er i dag, seier Normann. Dette gjeld alle tilsette, frå alle forskjellige fagforeiningar ved bedrifta, påpeikar han.

Han peikar også på det faktum at Hydro ville kjøpa verket og drifta to hallar, trass i at ein pandemi gjorde at ein brått sat med mange nye tilsette ein ikkje hadde jobb til, som prov på at det er ein fleksibel arbeidsstokk som vil arbeidsplassen sitt beste i det lange løpet.

– Me beviste dette nok ein gong. Å koma styrka gjennom ein negativ ting, er ein kunst, og eg syns heile organisasjonen på Hydro Husnes og i Husnes Kjemiske Fagforening har klart det. Styrken ligg ikkje i ein sterk leiar, men at alle er medlemmer, sluttar Normann.