SKAVE nominert til gjæv pris i New York
Den 10. mai blir den amerikanske designprisen NYCxDesign Awards delt ut i New York. Njål Thunold Hatteberg og designtrioen Ytre, er blant deltakarane som kan henta heim ein pris.
Publisert
Sist oppdatert
Den amerikanske designprisen blir kåra under New York Design Week og ICFF (International Contemporay Furniture Fair). Ytre er ein av ti finalistar til studentprisen, og dei er åleine om å representere Norge i denne kategorien.
Det er to andre norske design som deltek, men dette i andre kategoriar: Andreas Bergsaker deltek for Fram Oslo. Han er finalist i kategorien accessories med hylleskapet «Rundkast». Hadeland Glassverk stiller også som finalist, med deira reproduksjon av lampen «Arkiv 4006». Den tradisjonsrike produsenten deltek i konkurransen for første gong, og er nominert i kategorien golv/bordlampe.
Annonse
Element frå vestlandsarkitekturen
Ytre deltek i konkurransen med oppbevaringsboksane «Skave», eit produkt møbeldesignaren frå Rosendal tidlegare har skildra på følgjande måte til Grenda:
– Boksane er teikna saman med to medstudentar ved KMD. Her har vi teke føre oss arkitektoniske element frå vestlandsarkitekturen – bølgjeblikk, murstein og vestlandskledning. Elementa har vi implementert i denne serien oppbevaringsboksar.
Njål Hatteberg er student på masterstudiet på fakultetet for Kunst, musikk og design i Bergen. Saman med dei to andre i Ytre, Taran Neckelmann og Ayla Gürsoy, vil han vera til stades under prisutdelinga i New York.
Annonse
Skave har imponert før
I haust vann dei ein konkurranse i regi Håndverk+ og Fram Oslo. Temaet for konkurransen var ornamentikk, og målet var å løfta tradisjonsrikt handverk, teknikkar og metodar inn i framtida.
Vinnaren av konkurransen var Ytre, som då vart løna med utstilling i Oslo, stipend og ikkje minst med at produkta skulle gå til produksjon. Juryformann Andreas Engesvik rosa då trioen for boksane:
– Eg er imponert over Ytre, som viser ein «svoltenheit» og profesjonalisme i sitt arbeid med Skave. På tross av at dei framleis er studenter, visar dei eit gjennomført prosjekt, boksane er vakre.
NYCxDESIGN Awards blir halde for tiande gong i år, og seremonien blir halde på The Landing, Pennsylvania Plaza. Førstkomande tysdag vil det bli kjend om også juryen i denne designkonkurransen trekkjer fram den vestlandske design-trioen som svoltne og profesjonelle vinnarar.
