Skarveland skule blir lagt ned – byggjer ny på Valen

Så er det klart. Skarveland skule er historie seinast til skuleåret 2027/28. Då skal elevane frå Sandvoll og Valen samlast i eit heilt nytt bygg.

Etter skulestrukturvedtaket i fjor vår, har det vore usikkert kva framtid Skarveland skule går i møte. Til torsdagens kommunestyre låg det føre innstilling frå kommunedirektøren om å greia ut rehabilitering/nybygg på Valen skule, med tanke på å samla elevane frå Valen og Sandvoll innan skuleåret 2027/28. Men det låg òg føre ei innstilling frå levekårsutvalet, som i tillegg til same punkta som kommunedirektøren, også tok med at det skulle greiast ut om det er mogleg å samlokalisera allereie no til hausten.

– Det er eit tankekors når så mange tilsette og elevar søkjer seg vekk frå Skarveland. Men eg trur ikkje det er skulen det er noko i vegen med, det er situasjonen rundt. Det beste vil nok vera eit nybygg på Valen, for det blir ikkje nokon ny skule berre med litt tapet og maling, sa Matthias Zimmermann (MDG) og støtta nybygg/rehabilitering med innflytting seinast skuleåret 2027/28.

Gaute Lund (SF) tok utgangspunkt i forslaget til levekårsutvalet, men tykte komande haust var forhasta. I staden lanserte han 2023/24 som mogleg tidspunkt.

– Eg trur ei avklaring i seg sjølv er det viktigaste i denne saka. Kva dato som står, er ikkje så viktig. Dei må få vita kva som skjer, sa han.

Garantistar

Ove Lemicka og Frp ynska på si side å behalda begge skulane.

– At lærarar og elevar søkjer seg vekk, er eit produkt av all usikkerheita vi skapar. Vi ser det same på Sunde, der dei no ikkje får søkjarar til rektorstillinga ein gong, vurderte han.

Knut Johannes Helvik (H) understreka at Høgre i alle år har stått som garantist for at skulestrukturen skal vera som i dag, viss det er grunnlag for det og Fau ynskjer det. Men han opna for samlokalisering dersom det vert bygd ein flott skule på Valen. Han minna dessutan om at ei av årsakene til at 14 elevar friviljug har flytta til Valen, er mangelen på SFO-tilbod på Skarveland.

– SF er ein garantist for gode oppvekstkår, kontra Hege Lægreid Røssland (SF).

– Eg oppfattar at situasjonen har eskalert når det gjeld Skarveland. Uansett årsak, så er det ei utfordring for elevane. Å bevara det slik det er i dag; det toget trur eg er gått. Eg trur foreldra ynskjer eit større læremiljø for sine barn, analyserte ho.

Også Wivian Markhus (Ap) stod fram som ein sterk tilhengar av samlokalisering.

– Det som er heilt sikkert, er at Skarveland skule går i oppløysing frå innsida. Kvifor og kva veit eg ingenting om. Dei elevane som eventuelt vert igjen på Skarveland, korleis skal dei ha det? spurde ho seg.

– Di raskare, di betre for både elevar og lærarar, sa Markhus om ei samlokalisering.

Ein annan stad

For å prøva å konkretisera eit vedtak, vart det halde både gruppemøte og gruppeleiarmøte. På sistnemnde var det Vegard Bjørnevik (H) som til slutt bar fram teksten som fekk fleirtal.

– Vi opprettheld som no, til ny skule på Valen er klar seinast i 2027/28. Vi legg ikkje føringar for kvar den skal vera, kanskje det blir på ein annan stad enn i dag. I mellomtida skal det vera SFO-tilbod begge stader, sa han.

Dette vart vedteke med 24 røyster, etter at også Frp røysta for då deira eige forslag fall. Gaute Lund sitt innspel sikra seg 10 røyster.