Skal vurdera nye lokale til helsetenester
Fleirtalspartia opnar for å leiga lokale til helsesentertenester i Rosendal.
Publisert
Eit av verbalpunkta i budsjettet som vart vedteke, handlar om leige av areal til helsesentertenester i Rosendal. Der står det at kommunedirektøren får i oppgåve å fremja ei sak for Kommunestyret, der leige av areal til helsesentertenester i næringsbygg i Rosendal vert utgreidd. «Kommunedirektøren får fullmakt til å gå så raskt som mogleg i gang med utgreiinga og kontakta moglege samarbeidspartnarar», heiter det.
Utgreiinga skal mellom anna ha ei vurdering av moglegheitene for å inkludera fylkestannrøkta i helsesenteret, med fokus på effektiv utnytting av areal og synergieffektar mellom tenestene. Det skal også følgja med ei kartlegging av relevante næringsbygg i Rosendal som kan husa helsesenteret, med ei vurdering av lokasjon, tekniske fasilitetar og avtalevilkår.
Annonse
Saka skal leggjast fram for Kommunestyret allereie innan utgangen av mars 2025.
Remi Nerhus
Dette verbalpunktet minner mykje om forslaget Remi Nerhus (H) presenterte i Grenda i sommar. Han føreslo lokalisering av helsesenter, fylkestannlege og apotek i dei gamle lokala til Kvinnherad Sparebank. Dette innspelet hadde også Ove Lemicka (Frp) notert seg.
– Vi meiner tannklinikk og apotek er tiltak som vi må prøva aktivt frå kommunen si side for å få på plass. Vi bør følgja opp forslaget til Remi Nerhus, og koma med innspel til fylkeskommunen om å kanskje få det lokalisert i Vangstunet (bankbygget), sa han.
