Skal tilsetja ny fastlege: – Det er attraktivt å bli lege i Kvinnherad

I september vart det kjent at 200 innbyggjarar som har hatt fastlege i Rosendal har blitt flytta over til Halsnøy helsesenter, samt ytterlegare 58 over til Hatlestrand. Ifølgje kommunedirektør Leif Ove Mikkelsen skuldast dette at legane har eit stort arbeidspress, og det har nærast blitt ein trend nasjonalt å redusera på listene. I tillegg står fleire av legane i eit krevjande utdanningsløp, samt at dei må ta på seg legevakt kvar 14. dag. Dei kan såleis ikkje ha like omfattande pasientlister som tidlegare lege. Men Mikkelsen var klar på at flyttinga er mellombels, då ein satsar på å tilsetja endå ein fastlege i Rosendal.

250 pasientar i Rosendal får fastlege på Hatlestrand og Halsnøy

Kompenserande tiltak

I formannskapet tysdag ettermiddag kom Mikkelsen med ei oppdatering. Fyrste oppgåve er å laga plass til éin lege til.

– Vi prøver å samlokalisera betre for å få plass til fleire legar, sa han.

Stillinga som fastlege vert lyst ut med det fyrste.

– I motsetnad til i ein del andre kommunar, så er det håp om å få tilsett ny lege om kort tid. Vi har gjort mykje rett, slik at det er attraktivt å bli lege i Kvinnherad, vurderte Mikkelsen.

Han understreka elles at det er Helfo som har ansvaret for flyttinga av pasientar. Men både tilsetjing og samlokalisering/arealbruk er eit administrativt ansvar lokalt.

– Kommunedirektøren har fått fleire meldingar frå innbyggjarar om at det er politikarane sin feil at ein har kome i situasjonen med manglande tilgang til kontor. Det er ikkje riktig, og det er etter kommunedirektøren si vurdering heller ikkje naudsynt å peika på noko årsak no. Det viktige er å løysa problemet, og ein vil framheva at dette blir det jobba aktivt med, sa Mikkelsen.

Utfordrande

– Vi prøver å finna kompenserande tiltak for dei som har blitt flytta. Uansett skal ingen bli avvist ved nødvendig behov for helsehjelp. Vi ser elles på om det er mogleg å få til akutt-timar på næraste legesenter, men her har ein ikkje ei løysing per no, avslutta Leif Ove Mikkelsen.

– Dette er folk opptekne av. Mange kjenner på det med hastesaker, og for fleire har det blitt utfordrande å fornya reseptar, kommenterte Silvia Tofte (H). Ho var den som tok opp saka i kommunestyret i september.

– Håpar det ordnar seg. Og så er det veldig kjekt å høyra at Kvinnherad er attraktivt for legar, følgde Silje Nordtveit Olsen (SV) opp.

Føreslår å samla helsesenteret, tannlegar og apotek her

Overføra personleg

Grenda har snakka med ein uskedeling som brått fekk fastlege på Hatlestrand.

– Eg snakka med Helse Norge då eg fekk meldinga om tvangsflytting og etterlyste heimel for det. Dei sa at kommunen hadde bedt Helfo om å redusera lista til den nye fastlegen ned til 650 pasientar, og at dei ikkje kunne gjera noko med det, fortel han.

Mannen opplevde raskt at flyttinga medførte nokre utfordringar.

– Eg tok kontakt med Helse Norge igjen då eg ikkje fekk fornya reseptar via dei som eg hadde gjort tidlegare i Rosendal. Dei sa at det var fastlegen som måtte gjera det for han/ho skulle ha betaling for det. Då eg tok kontakt med Hatlestrand vart eg overraska då dei sa at eg personleg måtte overføra journalen min til dei før dei kunne bestilla. Dei kunne ikkje be om å få den. Sit det no cirka 260 pasientar som er tvangsflytta og ikkje veit at dei må overføra journalen sin til den nye fastlegen, eller gjeld det berre Hatlestrand?, undrar han.