Skal sykla til Lyon – for ei god sak

Det starta på ein fotballkamp i Åsane oppunder jul, då Brann-damene tok i mot Lyon i Champions League.

– Viss du får selfie med Ada Hegerberg så skal eg sykla til Lyon, sa Per Korsvold til dottera Erle Marie før kampen.

Det ordna seg, til blanda kjensler hos Per. For no nærmar det seg 2500 kilometer med sykling.

2500 kilometer

Om to veker startar han i Uskedalen, og han får følgje med ordførar Vegard Bjørnevik på etappen inn til Rosendal.

– Eg må ta ein buss gjennom Folgefonntunnelen, for det er ikkje lov å sykla gjennom, og skal til Hovden i løpet av første dagen. Andre dagen skal eg vera framme i Kristiansand, slik at eg kan starta dag tre med ferjetur over Skagerak. Etter det har eg ikkje noko spikra løype med stopp, meir ei cirkarute, seier Per.

Han kjem til å sykla på sidevegar, for motorvegane er uansett ikkje lagt opp for syklistar.

– Eg har lyst å ta ein liten omveg, slik at eg får med meg litt av Nederland, Belgia og Luxemburg på vegen, for det er land med stor sykkeltradisjon og -historie. Å få ta nokre kilometer i eit par av desse klassikartraseane er verd litt, meiner han.

Han reknar med at det blir over 2500 kilometer totalt.

– Eg kjem til å sykla ca. 100 km inn i Danmark på dag 3. Då planlegg eg dag 4 derifrå. Har nokre punkt som eg kjem til å plotta inn. 200 km til dagen er grovplanen, men vêr og vind kjem til å spela inn, seier Per.

Resten av familien kjem til å køyra ned til Lyon, men dei vil starta ei vekes tid seinare enn Per. Opphavleg ville dei få til og møta Ada Hegerberg i Lyon, men ho er i mest truleg i Oslo og førebur landskampar på den tida Korsvold kjem til mål.

– Men om ho er i Lyon, så møter me ho, seier Per, som har hatt så mykje med Lyon-spissen å gjera i etter kampen i Bergen at han no er på fornamn med ho.

Kreften nært

Per har kalla langturen sin for «Ride for a reason», og det med god grunn. Han skal samla inn pengar til Norsk Kreftforening på vegen sørover.

– Eg mista pappa til kreften då eg var 26 år, og eg mista sykkelkompisen min Sjur Langesæter til kreften for tre år sidan. Dag Otto Lauritzen var også kamerat med Sjur Langesæter, og dette betyr noko for han også. Han heiar på dette, understrekar Per Korsvold.

3. juli kjem Tour de France til Lyon. 4. juli rullar sirkuset vidare frå Lyon, med TV2 og Lauritzen tett på.

– Dag Otto har ledig plass i bilen til Ada viss ho mot formodning er i Frankrike då. Eg skal ha laupande dialog med TV2 undervegs, og dei vil ha ein reportasje når eg kjem til Lyon. Om det blir noko i forkant/undervegs er ikkje spikra enno, fortel 50-åringen.

Vonleg gir det innsamlinga litt ekstra draghjelp.

– Det har skjedd mykje på dei 24 åra sidan pappa døydde, og no hadde ein kanskje klart å berga han. Kreftforeininga gjer ein jobb som utgjer ein forskjell for både forsking og dei råka. Det er ein god organisasjon å gjera ein innsats for. Det er mange gode saker å støtta, sjølv brenn eg litt for denne, forklarer Per.

– Du veit, lover du barna noko, så må du halda det. Eg såg jo stjernene i auga til Erle Marie då eg sa det, så når vilkåret vart oppfylt, så vart det klart at eg måtte bu meg op sykling. Eg skulle gjerne ha trent meir, eg hadde tenkt å ha fleire kilometer i kroppen. Samtidig har eg sykla mykje tidlegare, og eg tenkjer at eg skal få sykla meg i form på vegen, seier han optimistisk.

Planen er opp mot 7-8 timar på sykkelen til dagen. Bagasjen skal vera ein spesialbag som han festar ut frå setet og ein liten bag på ramma.

– Eg skal ha minimalt med meg. Det vil bli gjort nøye vurderingar i forkant, og det blir vaskepulver og handvask av sykkeltøyet dagleg. Dette er ein lågbudsjett-tur, understrekar sprekingen.

Innsamling

Innsamlingsaksjonen knytt til turen er på gang hos kreftforeininga, og Per oppmodar til å gje donasjonar der.

– Kanskje nokon vil gje ein sum for kvar kilometer eg syklar, og så gjev ein når eg kjem i mål. Eg håper at bedrifter hiv seg på og støttar. Nokre har tatt kontakt og vil sponsa. Det er kjekt når dei tar kontakt, for dei har kanskje ein historie tett på seg som knyter dei til kreften. Då kan det bli nært, seier Per.

– Det er velvilje alle vegar eg snur meg. Me stenger ikkje innsamlinga når syklinga er ferdig, men tar ei oppteljing 1. august for å sjå kva det er blitt til, men det vil surra vidare, legg han til.

Når han er tilbake kjem han til å organisera ein auksjon til inntekt for innsamlinga.

– Eg har nokre unike ting eg har fått som folk kan få by på, blant anna nokre signerte fotballdrakter, men også litt anna spennande som eg får visa seinare. Det blir videooverføring på Festidalen frå ein eller annan stad i Frankrike også, lover han.

Han startar 17. juni, og «Ride for a reason – Lyon 2024» vil bli grundig dokumentert undervegs på Facebook og Instagram.

Familien skal køyra ned til Lyon og tar far igjen på slutten av sykkelturen. I Lyon blir det både høve til å sjå Tour de France-sirkuset med eigne auge, og så skal Lyon-supporteren Erle Marie inn og sjå på stadionet Ada spelar på.

– Me tar litt ferieturen vår der, køyrer ein tur innom Sveits og kanskje sør til Italia også.

Eg håper berre kroppen held heilt fram. Ein veit ikkje korleis kroppen svarer på dagevis på sykkelen. Det er likevel ikkje synd på meg, for dette er sjølvvalt. Om det er noko, så er det at eg er så tossen, sluttar han.