Skal redusera energibruk i alle kommunale bygg

Meldinga kjem frå kommunedirektøren, og grepet er forklart ytterlegare på heimesida til kommunen. Moglege tiltak som kan setjast i verk er å senka innetemperaturen og skru av lyset når ein forlet eit rom.

«Energi og energibruk i Noreg og i Europa har det siste året vore tema i svært mange samanhengar. Ein opplev i dag straumprisar som ein tidlegare aldri har sett. Det er òg ei kjensgjerning at tilgang på energi er ein ressurs som det ikkje er uavgrensa tilgang til», les ein på Kvinnherad kommune sin nettstad.

Felles ansvar å spara på ressursane

Her blir det også understreka at det er viktig at også Kvinnherad bidreg til redusert energibruk, sjølv om kommunen nyttar konsesjonskraft til eige forbruk.

Ei målsetjing er å endre vanar og haldningar til korleis ressursen blir nytta, og einingane blir oppmoda til å ta sin del av fellesansvaret det er å spara på energien.

«Dette betyr i korte trekk at det no vert ein gjennomgang av forbruk i alle kommunale bygg og anlegg og det blir vurdert sparetiltak, både på kort og på lang sikt. Tiltak på lang sikt vil som regel krevja investeringar, og dette vil verta omhandla i komande økonomiplan», sluttar kommunedirektøren meldinga.