Skal på tilsyn til lokale selskap
Fleire oppdrettsselskap med aktivitet i Kvinnherad må forventa å få Mattilsynet innom på tilsyn i år.
Publisert
Sist oppdatert
Mattilsynet har no utarbeidd ei liste over kva oppdrettsselskap som bør gjera seg klare til ein systemrevisjon i løpet av året.
– Vi meiner at forbetring på systemnivå betyr forbetring for flest mogleg dyr, seier direktør Bård Skjelstad i ei pressemelding.
Annonse
Revisjonane vil i hovudsak dreie seg om dyrevelferd ved luseoperasjonar, biosikkerheit og velferd hos reinsefisk. Men revisjonen av selskapa sine styringssystem og verktøy inkluderer også verifikasjonstilsyn hos 10-15 % av selskapet sine lokalitetar. Hensikta er å sjekka kart og terreng, og om overordna planar og system vert omsette til praksis på merdkanten.
Stor nytte
– Vi ynskjer å vera tydelege og føreseielege, slik at dei som skal ha revisjon har moglegheit til å setja i gang forbetringsarbeid før vi startar revisjonsløpet. Eit viktig mål i dette arbeidet er jo å bidra til felles læring i næringa, det er nettopp derfor vi publiserer alle revisjonsrapportar fortløpande, seier Skjelstad, og meiner bedriftene kan ha stor nytte av å utveksla informasjon.
Oppdrettsselskapa som førebels står på besøkslista, er valt utifrå storleik, kvalitative vurderingar og erfaringar frå tidlegare revisjonar og tilsyn, i tillegg til hendingar og registrert dødelegheit. 12 bedrifter står på lista, bland dei Lingalaks, Alsaker Fjordbruk og Mowi Seawater Norway AS.
