Skal massetesta elevar ved KVV etter påske

Etter påske kjem Vestland fylkeskommune til å utvida prosjektet med å massetesta elevar og skuletilsette for covid-19.

Frå før har fylkeskommunen gjort seg gode erfaringar i pilotprosjektet der Fyllingsdalen vgs og Askøy vgs er med. I dei siste to vekene har det på desse skulane blitt avlagd 2358 hurtigtestar, og heile 88 prosent av elevane har delteke frivillig. Ingen har vore smitta av viruset, sjølv om ein hurtigtest var positivt.

– Målet er å oppdaga smitte tidleg, og dermed bidra til å halda skulane opne, skriv Vestland fylkeskommune i ei pressemelding.

 

Gode erfaringar

No vil 24 nye skular ta del i massetestinga. Blant dei finn vi Kvinnherad vidaregåande skule.

– Slik vi har innretta prosjektet til no vil elevar og tilsette bli tilbode å testa seg to gongar i veka. Dersom det kjem sentrale retningslinjer for testing i skulane, kan dette endra seg. Etter mi vurdering er det svært gode tilbakemeldingar frå elevar og tilsette som har delteke i prosjektet. Blant anna blir det peika på at testinga skapar tryggleik i skule- og arbeidskvardagen, seier prosjektleiar Odd Bjarne Berdal.

 

Opnar for munnbind

Kunnskapsdepartementet tilrår som kjend at skuleeigarane i samråd med lokale helsemynde kan vurdera bruk av munnbind utanfor undervisinga som eit ekstra smittverntiltak for elevar og tilsette. Dette tiltaket innfører Vestland fylkeskommune på sine skular frå 12. april.

– Elevane og dei tilsette vil få utdelt munnbind på skulen, og skal ikkje betala for dette. Det er frivillig å bruka det. Sjølv om dei har munnbind på må dei framleis halda avstand og følga smittevernreglane, seier opplæringsdirektør Bjørn Lyngdal i ei pressemelding.