Skal leita etter feilen på gateljosa

Det er berre knappe to veker sidan Grenda skreiv om defekte gateljos på Valen, i Uskedalen og i Dimmelsvik. Då greidde folk frå fylkeskommunen å få ljosa til å fungera igjen.

– Problemet er at anlegga er frykteleg dårlege, så enkelt er det. Gateljosa har blitt reparerte nokre gonger tidlegare, men etter at dei er fiksa, så held dei kanskje eit par dagar før dei dett ut igjen, sukka byggjeleiar Tommy Totland.

– Problemet er at anlegga er frykteleg dårlege

Diverre så skjedde akkurat det same i Dimmelsvik også denne gongen. Totland fortel at han er kjent med og jobbar med saka.

– Vi har det høgt på lista. Eg var der seinast på måndag og feilsøkte, utan å finna ut av problemet, opplyser han.

Trafikkdirigering

I morgon onsdag fortsett truleg arbeidet.

– Viss alt går etter planen skal vi fortsetja feilsøkinga då. Så får vi sjå om vi får luka ut feila, men eg kan ikkje gje nokon garanti om at vi får anlegget opp og gå igjen. På sikt må vi byta ut kablinga. Inntil vidare må vi berre prøva å få det til å lysa igjen, fortel Tommy Totland.

Området utan ljos strekkjer seg frå brua i Dimmelsvik og ut til kontoret til BKK. Onsdag blir det manuell dirigering av trafikken på strekninga.

– Eg ber folk køyra forsiktig, ta det med ro, og respektera kommandoane frå trafikkdirigentane, oppmodar byggjeleiaren.

Melda frå

Han minner igjen om at det beste er om folk melder frå om feil med gateljosa via skjemaet på Vestland fylkeskommune si heimeside.

– Det kjem det på rett plass i systemet. Viss ein ringer, så kan det vera at meldinga hamnar hjå nokon som ikkje jobbar med dette, seier Totland.