Skal kartleggja delar av Halsnøy
Til sommaren kjem det eit team fagbiologar til Kvinnherad for å kartleggja såkalla viktige naturtypar.
Kartlegginga skjer gjennom eit landsomfattande prosjekt der ein del naturtypar har blitt plukka ut fordi dei blir rekna som spesielt viktige for det biologiske mangfaldet.
Ikkje gamledagar
Annonse
– Desse områda kan anten vera veldig artsrike, innehalda spesielle artar og miljø eller det kan vera naturtypar som er artsfattige men sjeldne. Dette er ein del av eit mangeårig prosjekt for å kartleggja viktig norsk natur. For å ta omsyn til areal må ein også veta kva ein har, fortalde seniorrådgjevar ved Statsforvaltaren i Vestland Olav Overvoll over telefon.
For å veta kor det skal kartleggjast har Statsforvaltaren i Vestland bedd kommunane om kva område dei sjølve kunne tenkja seg å få kartlagt. I Kvinnherad er det nordre del av Halsnøy som skal få besøk av biologane.
– Det er i grunn ganske enkelt. Biologane skal rett og slett ut og traska i naturen og registrera det dei ser. Det er ikkje som i gamledagar då dei gjekk rundt med ei papirblokk og blyant. No har dei med seg ein ipad der dei legg inn all data direkte i eit databasesystem, forklarte Overvoll.
– Så i løpet av hausten og vinteren må dei arbeida seg gjennom all dataen før det blir tilgjengeleg for ålmenta til våren igjen. Då kan kven som helst gå inn og sjekka, trass i at ein nok må ha litt grunnleggjande datakunnskapar for å finna fram. Men i dag er jo folk veldig van med slikt, la han til.
Annonse
Nyttig
Målet for kartlegginga er å få betre kunnskap om naturen, då særleg dei som blir rekna som viktigast. Dette kjem fram på Statsforvaltaren sine sider:
«Målet med kartlegginga er å få på plass kartfesta informasjon om kvar det finst naturtypar som er viktige for artsmangfaldet, til bruk i mellom anna arealforvalting. Stadfesta informasjon om natur som er tilgjengeleg tidleg i ein arealplanprosess, vil gjere det lettare å ta omsyn. I tillegg kan det bidra at planprosessar blir meir effektive og føreseielege. Kartlegginga kan òg vere nyttig for grunneigarar som ønskjer å søke om tilskot til skjøtsel av truga naturtypar i kulturlandskapet.».
