Skal investera 100 millionar i nytt bygg: – Må tilpassa oss verkelegheita

I ei pressemelding skriv Hydro at dei skal investera 100 millionar i nytt og moderne bygg for garderobar og industrivern på Husnes.

Det splitter nye garderobebygget på Husnes skal gi auka trivsel og betre omkledingsfasilitetar for alle tilsette. Bygget skal plasserast ved inngangspartiet til verket, slik at dei tilsette no vil ha arbeidstøy og verneutstyr på før dei kjem inn på industriområdet.

Veksande kvinneandel

Bygget til 100 millionar kroner skal også husa ein ny industrivernstasjon, og vil etter planen stå klart i løpet av 2026.

– Det nye garderobebygget med omkledingsfasilitetar og brannstasjon er eit svært positivt tilskot for å auka trivselen, styrka tryggleiken og gjera det meir attraktivt å jobba på Hydro Husnes. Vi har lenge sett at vi måtte gjera noko med standarden og kapasiteten i garderobane. Dessutan er ikkje dette lenger ein like mannsdominert arbeidsplass. Vi må tilpassa oss verkelegheita med ein stadig veksande kvinneandel i organisasjonen, seier fabrikksjef Jon Ola Ystgaard i pressemeldinga.

Godt forankra

Det har blitt investert mykje på Hydro Husnes den siste tida og i løpet av dei siste åra er det tilsett over 100 nye operatørar.

– Men kvinneandelen har auka, og ein tar ikkje munnen for full om ein seier at tida har sprunge ifrå anlegga våre slik dei er i dag. Derfor er det veldig bra at vi no kan tilby garderobar med ein skikkeleg standard for alle tilsette. No gjenstår ein trygg og godt forankra prosess fram mot det endelige resultatet, seier Tor Jørgen Sætrevik, hovudtillitsvalt for Husnes Kjemiske Fagforening.

Solceller

Det nye bygget skal utstyrast med solceller på taket og bruka overskotsvarme frå produksjonen til oppvarming.

«Dette er i tråd med Hydro sitt mål om å redusere fotavtrykket og fremja grøne løysingar i operasjonane. Det har óg vore viktig å skapa ein gjennomarbeida plan for det nye garderobebygget med god forankring i heile organisasjonen» skriv Hydro i pressemeldinga.