Skal få jobba med «hårete mål»

Som Grenda skreiv tysdag er Peder Sjo Slettebø tilsett i stillinga som rådgjevar i sektor for samfunnsutvikling.

– Til den stillinga ligg det mykje jobbing med samferdslesaker, med nyskaping, med omdøme, befolkningsutvikling og berekraftig samfunnsutvikling, opplyste sektorleiar Anbjørn Høivik då han tysdag ettermiddag presterte Sjo Slettebø for pressa.

Hårete mål for Kvinnherad

Høivik slo fast at Kvinnherad gjennom ny kommuneplan strekar «opp nokre ganske hårete mål for Kvinnherad», som eks-ordføraren mellom anna skal bidra til å nå.

– Målet om å vera netto nullutsleppskommune innan 2040 skal nåast. Me skal ha på plass store gang- og sykkelvegprosjekt. Vegnettet vårt treng forbetrast. Kollektivtilbodet treng styrkast, særleg ungdommane etterspør dette. Alt dette og meir til er saker som Peder skal få bryna seg på, ramsa Høivik opp frå skal gjera-lista som ligg føre dei.

Sektorleiaren fekk mange og varierte kandidatar til stillinga, og forklarte at det i hovudsak var tre felt dei måtte sjå at dei fekk treff på kvalifikasjonane på.

– Det er fagbakgrunn, realkompetanse og personlege eigenskapar. Det er sjeldan at nokon får full treff på alle dei tre, så desse felta må då sjåast opp mot kvarandre. Det me har lagt ekstra vekt på i denne tilsetjinga er det dei to siste, kommenterte han.

No er Peder Sjo Slettebø ein som dei aller fleste lokalavislesarane i Kvinnherad har høveleg god kjennskap til, og utfyllande presentasjon av 35-åringen er kanskje ikkje naudsynt. Eigenskapane som Kvinnherad kommune ynskjer å gjera seg nytte av, er kanskje meir interessante å nemna.

– Slettebø er kanskje eit overraskande val for mange. Samla sett er eg veldig godt nøgd med tilsetjinga. Eg trur me skal få god bruk for hans erfaring frå kommunesektoren, frå pådrivarselskapet han no er tilsett i, og for så vidt frå det journalistiske virket hans også, vurderte Høivik.

Takka for tillita

Slettebø avslutta fire år som ordførar i 2019. I 2020 byrja han som journalist i Kvinnheringen, før han tok til som dagleg leiar for pådrivarselskapet Sunnfast AS i 2021. I midten av august blir Kvinnherad kommune arbeidsgjevaren hans igjen, sjølv om rolla er annleis enn sist.

– Eg vil seia takk for tillita frå Anbjørn og Kvinnherad kommune. Å få vera med og påverka utviklinga til Kvinnherad er noko av det eg har brukt tida mi til. Å koma tilbake til rådhuset gler eg meg til, og eg er veldig motivert for dette. Demokratiet er avhengig eit velfungerande byråkrati, og eg vil ikkje ha problem med å stilla meg bak fleirtalsavgjersler, sjølv om eg på eit tidlegare tidspunkt eventuelt har fronta andre syn, sa Slettebø om jobben han no tar til i.

– Kva skjer med Sunnfast når du gjev deg der?

– Det skal styreleiar Sverre Olav Handeland og styret få svara på, men utgangspunktet er no komen dit at selskapet har utarbeidd ein del rapportar og planar, som dannar eit godt grunnlag for det vidare arbeidet, og så er det no den fylkeskommunale prosessen som er det neste steget her, svarte Slettebø.

– Eit samla kommunestyre har stilt seg bak Sunnfast. Du er ikkje redd for å ta ein ressurs vekk frå arbeidet med å realisera noko Kvinnherad meiner er viktig?

– Nei, eg er ikkje redd for det. Det har Peder gjort gode og grundige vurderingar på sjølv, og eg har eit sterkt inntrykk av at dei har snakka saman om dette i Sunnfast, sa Høivik.

– Sunnfast-engasjementet botnar i eit engasjement for Kvinnherad, men det er éin konkret sak. Samferdsle og kommunikasjon vestover er ikkje Kvinnherad si einaste utfordring eller mogelegheit, så eg ser fram til no å jobba med sannsutvikling på eit endå breiare felt. Ein kjem til å eit punkt i livet der ein ser etter den jobben ein kan bli i lenge, og det ser eg for meg her. Viss det viser seg at det var rett val, la han til.

– Kva reaksjonar ventar du å få på denne tilsetjinga?

– Eg forventar positive reaksjonar på dette, fordi eg kjenner han som ein drivande kar, slutta Høivik.

Eks-ordførar Sjo Slettebø sitt namn var unnateke offentleggjering då søkjarlista var gjort kjent. I kampen om jobben kom han sigrande ut av tvikampen med Rasa Aliosaitiene, Dag Otto Brænde, Kristian Helgesen, Jon Mikkel Sjo Prestegård, Ingvild Revne, Elise Sundal og Wermund Vetrhus.