Skal drøfta aksjekjøp i Hordfast AS
Viss formannskapet seier ja i møtet måndag ettermiddag, vert Kvinnherad kommune aksjonær i selskapet Hordfast AS.
Publisert
Hordfast AS vart stifta i 2010, med føremålet om å arbeida for ferjefri kyststamveg E39 i Hordaland. No vil selskapet utvida til å arbeida for realisering av ferjefri veg mellom Stavanger og Bergen. I samband med dette vert begge fylkeskommunane og ti nye kommunar inviterte til å teikna aksjar. Frå før er åtte kommunar med på eigarsida, samt fleire næringsorganisasjonar.
Kvinnherad kommune er invitert til å kjøpa fem aksjar til ein kostnad av 20.000 kroner per aksje. Saka var oppe til handsaming i formannskapet i mars i år, men då vart det bestemt å utsetja saka til budsjettprosessen for 2025. Der er ein no, og saka kjem difor opp igjen på måndag.
Annonse
Avventande
Kommunedirektøren legg fram ei positiv, men avventande innstilling i seks punkt:
1. Kvinnherad formannskap er positive til deltaking i pådrivarselskap som kan fremja god samferdsleutvikling for Kvinnherad.
2. Før eventuell aksjeteikning i Hordfast AS må selskapet sitt nye føremål vera klart, og det må vera i tråd med Kvinnherad sine kommuneplanmål og -strategiar.
Annonse
3. Vidare må det vera klart korleis drifta av selskapet skal finansierast, og kva forventningar som vert stilt til eigarane i den samanheng.
4. Det er viktig at Kvinnherad kommune gjennom ein eventuelt eigarskap får selskapet si støtte i saker som er sentrale for Kvinnherad si tilknyting til E39, og at pådrivarselskapet arbeider for kommunane i regionen sine tilknytingsprosjekt.
5. Ordføraren og/eller dei han peiker ut deltek i selskapet sitt informasjonsmøte 3. desember for å gi og få informasjon.
6. Ordføraren orienterer formannskapet i møte 5. desember. Etter dette vil avgjersle om eigarskap, og eventuell finansiering av aksjekjøp, verta politisk initiert i budsjettarbeidet for 2025.
Hensiktsmessig
«Deltaking i pådrivarselskap er i størst grad ei politisk vurdering. Kommunedirektøren ser at det kan vere hensiktsmessig å delta i slike samarbeid dersom det er politisk vilje bak, og at pådrivarselskap kan vere aktørar som fremjar saker av verdi for kommunen og som kan gi både betre framdrift og resultat. Kommunedirektøren meiner det er moment om både nytte og kostnad for Kvinnherad som bør opplysast betre før ein gjer endeleg vedtak om eigarskap i selskapet», heiter det i saksutgreiinga.
