Skal driva ny seglskute

Terje Skorpen og Einar Matre har drive båten i ei årrekkje, og leverer ho no frå seg til Interesselaget «Galeas Gurine».

– Dei ser fram til å samarbeida med oss. Dei er kjempeflinke seglarar, og me har mykje å læra av dei. Avtalen med Skorpen og Matre er at interesselaget overtar båten, mot at dei får ein del av inntektene til båten i ein viss periode. Då er me fornøgde, begge partar, meiner styreleiaren for interesselaget Anders Jordal.

Øva på segling

Skuta har ikkje vore i drift sidan 2019, men interesselaget har hatt ho på land, synfart skuta og kosta på botnsmurning av ho.

– Me har hatt Kristian Djupevåg med oss, og han er offisielt godkjent takstmann og sikrar oss på det viset at me veit kva me overtar, og at «Seladon» er i god stand. Me hadde ikkje overtatt denne skuta om det var mykje å vøla. Me skal ikkje gjennom ein ny Gurine-dugnad på denne, seier styreleiaren for interesselaget.

«Seladon» er 58 fot, medan «Gurine» er 72 fot. Likevel har sistnemnde tre gongar større volum innvendig. No skal dei vaska og mala førstnemnde innvendig, og så skal dei læra seg å segla ho.

– Me skal trena oss på ho. «Seladon» skal vera med på ei vekes sommarskule i byrjinga av juli. Det er ei veke der «Gurine» er leigt ut, forklarer Jordal.

«Seldaon» vart bygd i Svoldal i 1937, og får no base i Rosendal.

– Me får sjå kva me gjer framover. Me må berre forsikra oss om at ho er i god nok stand, og presentabel for det me har tenkt å nytta ho til. Ho er enklare innvendig enn «Gurine», men blir eit fint tilskot for oss, meiner Jordal.

– Ta vel i mot skuta

Til Sunnhordland skriv eigarane Terje Skorpen og Einar Matre dette om at «Seladon» blir gitt til interesselaget «Galeas Gurine»:

«Då er det endeleg. «Seladon» vert no given til interesselaget Gurine i Rosendal. Dei har stor interesse og iver for «Seladon». Me har tillit til dei nye eigarane, og deira store vyar for vidare drift av skuta.

Me har drifta Seladon i 30 år, med heimehamn Fitjar. Båten har me hatt i 41 år. Dei første åra gjekk med til restaurering og ombygging. Det har vore 30 spennande år, med mange gode opplevingar langs kysten og i Nordsjøen. (...) Ta vel imot skuta der de måtte treffa på ho.»